THINLUNG KHAWNGAIHTHLAK - 2

THINLUNG KHAWNGAIHTHLÂK 

CHAPTER 2 

Ririni Khiangte Abbra Pitartei

Thâwk la ham ham chungin ka pa kal chhuak chu ka melh zui ngat ngat a, ka hmâ ngai tak ang leh min ngaihtuahna nei ve ang maia, a țawng vàng ngawta ka hnuk lo no ngawt chu ka duh hauh lo bawk. Min hmangaih tak tak ni se ka duh dànte min zâwt hmasa ve ang a, ka hmâ a ngai tak zet a nih chuan pasal nei tùra min tur ngawt lo hian a nun a siam țha ang a, a chhûngkua hi rèl fel a tum ve tùr a ni. 

"Ahriat, Mapuia kha mi țha tak a nia sin," u Maliani'n a lo tih ve chuan, "Ka va han âwih lo ber!" ka ti deuh vak a. Mi țha a nih ka ring lo lutuk chu ka nui chhuak hial bawk.

Ani ang officer chin phei chu, an lerh in hmeichhia an lawm thei ropui si. Nupui neih tawh hnu pawha nula kawp sim thei lo khawpa nun- chen nuam ti tak an ni fer fur bawk. Ani pui pawh kha a pa lianin a chhe miah silo a, a lerh ngawt ang.

Ka sîra inthlahrun hmèl deuha u Maliani ding chu ka chhoh en a, "Mi țha ni se a hriat ngai loh tleirãwl tê lehnghâl neih tumin a chhûngte a lo be teuh lo," ka ti leh vak bawk. Ka thil sawi zawh tak chiah avàng chuan u Mapuia chu ka haw zual a, zak theilo ka tih êm avàngin ka chhûngril chu a lo sahâl titih a. Eng angah nge maw a inngaih le!? Mi țha tak a nih vàng ngawtin kei hian ka neih duh mai a inring chu a ni ngei dâwn si a, Pathian leh! Zahna a pianpui ve lo hial zâwk a niang.

U Maliani bawkin, "Ani chuan a hriatna che a rei tawh a sin," a lo ti leh chu mak ti zetin ka en chho lehnghâl a. U Maliani lah chu a lo nui mai a.

"Engtin nge min hriat a? A lo lêng țhìn em ni? Nge zu a lo in ve tawh țhin zawk?" ka ti nghâl mawlh mawlh a. Hmuh pawh ka la hmu ve ngai hauh silo a, ani'n min lo hre chiang daih bawk si chuan min țhâwng a, ngaihțhat lohna hian min tuam zui hlup bawk.

"Va intifai rawh, i berh vek a nia," u Maliani chuan a lo ti daih, zawhna tam tak ka nei tih chu hre thiam reng mah se hre lo ang hmakin a awm zui a. Thlêng chu a seng fel mawlh mawlh a, Dawhkàn a lo hrûkfai lai paw'n ka țhut dàn ngaiin ka la țhu reng a. U Mapuia'n hmân aţang min lo hre tawh ni a, a sawi mawlh chuan awm a ti nuam lo zual a. 'BDO meuh a ni si a, a inzirlai in vai ram lamah a tâl tam ngei dâwn a. Sumdâwnna thianghlim lo zet ah te a lo inhnamhnawih ve reng a niang,' tih vêl te chu ka ngaihtuah kual a. Pa țhapui ni a langte pawh, mihringa sumdâwnna lamah an in hnamhnawih nasa hle tih chu, hre lo fa kan awm tawh lovang. U Mapuia pawh hian kan chhûngkaw dinhmun hre chiang tùrin min lo zir chiang reng tawh ang a, a target ka nih pawha ka chhûngte lamin min buaipui zui vak dâwn lo tih a chian hnuah, a nupui tùr angin min lo be ta a nih te chu ka ringhlel zo vek tawh. Innei ta chiah ila ka chungah eng thil nge a tih duh ang tih lah tu hriat phâk a ni lo, sumdâwn nân min hmang daih duhin a nia ka rin ni.

Chutia rilru buai zeta ka awm chu u Maliani bawk chuan, "Kei chuan pasal nei la, he in aţang hian kal chhuak vat la ka duh," a rawn ti țha leh a. Dawhkàn rinchhana lo dingin chiang tak hian min en bawk.

"I nuhrawn anga lo inrawlh ve ah min ngai lo la, hmeichhia ve ve kan nih vànga ka duhsakna zâwk  che a ni. He inah hian i him hlawl lo tih chu i hriat kha," a lo tih leh lai chuan rum tak mai hian ka melh tawh. U Maliani erawh a thinrim duh hauh lo thung, he nu hian ka pa ngei pawhin min hriat thiampui phâk loh ka rilru put hmangte chu a lo hre ru reng zâwk em ni !?

"Zan tam tak chu i muthilh laiin Chinghne koham rualho hian an khawih palh ang che tih hlauin ka veng țhìn che asin," zaidam tak hian a ti leh ta zel a. Rang zetin mit ka la sawn nghâl daih bawk.

"Thinthi in zân hun i hmang ngai lo tih pawh ka hria, i pa ah beiseina i nei ngam tawh lo a, i hlauh rûkna te lah tu bulah mah i sawi chhuak ngam ngai lo... Ka hria, ka hre vek.... Chuvangin zàn lamah chuan rui lo hai lo a awm ka tum hrâm hrâm zêl. Zân lama ina lo lût chhuak țhìn te lah theih tâwpin ka chîk phah bawk, pindan kawngka lam melh tu an awm ngawt paw'n ka hmuh loh hlanin an lo lût ang a, an lo khawih mai ang che tih hlauin Kawngka bulah hlîr sawn ka țhu țhin. Nang erawh chuan i hre kher lo ang," a ti sep sep a.

Ni e, chutiang tak chuan ani hian min vênhim a lo tum țhìn tih chu ka lo hre thiam ngai hauh lo. Mut hmunah hlauthâwng ru zeta ka leh kual sek țhin laite khân pâwn lamah min lo veng reng țhìn chu a ni àwm sia, ka mittui lo tla chu thup duh viau mah i la hrûk sen loh in a lo luang thla zung zung a. Min hringtu te aia ani mihrang daihin min hre chiang leh ka himna tùr a lo ngaihtuah nasa țhìn lutuk chuan min ti nâ ni berin ka hria. Engati nge a tih ang hi ka nu leh pate zâwkin an tih ve ngai miah loh le!?

"I pa sawi ang khân kan bulah i awm reng a nih chuan, humsual dai miah lo pawh ni la, mite en dàn che hi a hniam reng dâwn. Pasal nei la he chhûngkua ațang hian tâl hrang la, chhûngkaw zahawm tak din thar rawh u," a ti leh mial mial a. Ka pa nupui a nih tirh aţang khân hmeichhe rilru chhe tak a ni lo tih chu ka hre thiam a; mahse, ka hmakhua a lo thlîr lâwk ve nasa țhìn lutuk erawh ka lo beisei phâk loh lam daih a ni.

Sawi tùr hre lo zeta ka ngawih ngat ngat laiin amah bawk chuan, "Kan lo pian chhuahna chhûngkuaah duh kan thlang thei lo a, kan din tùr chhûngkua erawh duh kan thlang thei an tih țhin kha. I lo pianna chhûngkua hi i duh thlanna a ni lo; mahse, i din tùr chhûngkua erawh i duhthusàm ang takin i siam thei a. Nun bul țan țha leh rawh," a ti leh mial mial a. A sawi ang khân ka nuhrawn ang a thu min pe ni lovin, hmeichhia ka nihna ang a min duhsak vàng zâwk tih chu ka man thiam ve tho.

Ngawi renga ka khap fak fak laiin u Maliani bawk chuan, "Mapuia te chhûngkua hi chhûngkaw zahawm tak an ni, a pa hi kohhran upa a nih bâkah Synod office-ah a thawk ve a. A nu pawh Higher-ah zirtîrtu hnà a chelh reng a, tun hnai khân a pension ta nge, ama'n chawlh a dîl zâwk ni ta kha ni. Mapuia te unau hi pali lai an ni a, mi puitling tak tak vek an ni. An unau zînga upa ber hi Pastor niin vai ram lamah an chhûngkua in an awm thung, Mapuia hi a upa ber dawt a nia, ani hi a râwlthar chhuak kha a han sual ve that that nâin 'BDO' ni thei khawp in a rawn in sangmar thar leh thei a nih hi," a tih lai chuan ka lo in sangmar nasa ve hle a. Râwlthar sual nei tawh a nih tih ka hriatna chuan amah ka rinhlehna chu a lo belhchhah a, Ui mei pawh a ngîl reng thei lo an tih ang deuhin, râwlthar sual nei that that chin chu thâwk leh khatah a țhat thut ka ring thei hlawl lo. Chhan neiin kei hi min bitum ni ah ka ngai nghet tulh tulh tawh.

"An unaua a tê lam pahnih te chu hmeichhia ve ve an ni thung, Mapuia nau chiah hian 'USA' lam mi Pathian rawngbâwltu bawk pasal ah a nei a. Anni pawh USA lamah an awm tam zâwk, an tê ber chu nang aia û deuh a ni a, kei hi min rual pha lo deuh bawk a, kumin hian M.A a zo ve chiah ang," a ti zêl a. An chhûngkua chu a hriat chian hmêl khawp mai.

"Chutiang chhûngkua chuan kei hi engtin nge an 'Mo' atân min duh theih ang a? Kha Mapuia kha a â tawh a nih kha, nge ni a min hmusit lutuk zâwk!?" rilru sehhel zetin ka ti lêt fan a.

"Min nei a nih chuan vai ho bulah min zuar daih duh in a nia ka rin ni," ka tih leh chuan, "Awi!" a lo ti hluai a, a nui zui kar kar a, "Chutiang ti duh tur mi chu a nilo," a ti deuh ringawt a. U Mapuia ka puhchhe lutuk chu mak ti hmêl a pu hial zâwk bawk.

"Ka mi rin zâwng a ni ve lo, min be hmasa miah lo in ka pa a lo be daih te hi a dik lo," ka ti leh nghat nghata, u Maliani chuan min sawi pui zui ngaihna vak a hre ta lo aniang thlêng sil tùrin sìl hmun lam a pan ta daih a.

Mapuia chungchâng bîk ka ngaihtuah ringawt paw'n ka thinrim thar nghâl zêl, a zakthei lo ka ti bawk êm a ni. Kei nêna inbiak hmasakna pawh awm hauh lo a, ka pate kiangah min neih a duh thu a lo sawi hmasa hi thil kal phung pawha ni lo.

Kan chhûngkaw dinhmun a hriat chian êm avàngin, min neih a duh thu ka pa hnenah a sawi chuan, a lo hnar phal dâwn lo tih a hre lâwk te pawh a ni maithei. Aaaaa, a eng vàng pawh chu lo ni se keimah min hriattîr hmasa lo a, inneih chungchâng ka chhûngte a sawi pui ngam chu a zahtheih loh vàng bâk va ni suh! Pasal ka neih duh leh duh loh pawh a hre dèr si lo.

Ka inbual laiin ka pa kal chhuak pawh a lo lêt leh tawh a. Card dêng tur te'n an lo zui haw bawk nên kan inah chuan an ri leh luih luih tawh, nichin lâwkah kut min thlâk a ni tihte chu, hre lo ang maiin a card denpui te kiangah chuan a nui huau huau a. Dàn ngaitein Pindan chhûngah ka tawm tlat a. Lucy message pawha lo awm tawh nâin ka la chhâng lêt lo.

Chau zetin Khumah ka mu a, ka rilru chu a vak kual thui hle a. U Maliani thil sawi pawh kha a dikna chen a awm tih chu ka hria, zu zuar fanu ni mah ila ruihhlo leh a kaihhnawih eng thil mah ka ti ngai lo, zuk leh hmuam chî tak ngial pawh ka ti ve lo chung paw'n, ka chawrchhuahna avàng hian mi tam tak chuan min hmu pelhê tlat tho! Class kal châng bâka ka pâwn chhuah ngai loh țhin vei nên, mi tam tak chuan zàn lama vak chhuak țhìn hial ah min chhuah a. Kan in a zu in tùra lo chuangkai țhìn te nên, tenawm taka inzawmna nei ang hiala min lo chhuah tâwk lah an bo lo. Kan inah hian ka awm reng a nih chuan mite min ngaih dàn chu a ngai reng dâwn tih pawh ka hre chiang ve hle.

Mahse, pasal nei tùr chuan rilru ka la siam chhin ngai lo. Pasal neih maw? Kan innei anga fate kan nei anga engtin nge ka fate chu ka enkawl ang? Nu leh pa hmangaihna dawng ngai lo tu hian fa enkawl ka thiam dâwn em ni, chhûngkaw din maw? Piantirh a ta nu leh pate inhau rî leh an kut inthlâk thâwm avànga hlaua kim-ki chawih chawih țhìn hian, engtin nge chhûngkua ka hui khâwm theih ang. Chhûngkaw inenkawl dàn hrisel lo lutuk ațanga lo chawr chhuak ve tawp hian chhûngkaw dang ka din ang maw? Ka seilenna chhûngkaw boruak ang bâk kei hian ka siam thiam lul lo ang!

Ka Phone nghawr chur chur rî chuan ka ngaihtuahna a ta chu min hruai pêng a. Phone screen-ah chuan Lucy hming a lo lang kalh bawk.

A message tam tak ka chhâng lêt silo a, a lo phîlî leh vak tawh a nih dâwn hi, "Hello" ka tih rual rualin, "Engati nge message i reply theih miah loh, thil thleng a awm em ni?" a lo ti bak hlur a.

"Thleng țeuh," ka ti lêt nghat a, "sawi chiang teh, in ka thlen hnu thleng paw'n ka ngaih a țha thei lo. In inlêng te kha tute nge? An mahni nêna inkaihhnawih a ni em? I pa khân mi pawisa te a lo ba em ni?" a lo ti nghâl mawlh mawlh a. A lo sawi ang te chu thil thlen dàn ni thei zâwk se a tihawm ngawt mai.

"Kha Zahnatlachhampa khân palai a lo tîr dâwn," ka ti a. Ipik fahranin ka thaw zui hak bawk.

"Eng nga?" Lucy pawh chuan a lo ti tuarh a, "I tân maw palai a lo tirh dâwn a?" A lo tih leh chuan, "U Maliani tân zawk a niang," ka ti lêt a. Hul zetin ka nui zui hak bawk. 

"Sawi țha teh.. aaa.. phone ațang chuan a chiang duh lo êm mai, ka lo kal dâwn," a ti leh bawrh bawrh a, ka chhàn lêt hma hauhin phone chu a off daih zui. Lo kal poh teh se, tlânbo dàn tùrte pawh ruahmanna min siam pui thei mahna.

'Suangtuahna ram lo chu hlimna dik taka awm lo' an ti ngai a. Kei erawh ka suangtuahna ram lah chu ipikna hlîrin a khat a, a thawven thlâk lohin hlimna rêng a awm ve ngai lo. 

Rin ang ngeiin Lucy chu a lo thleng thla rang khawp mai. Pindan ah a lo lût tlang nghâl a, Khum a ka lo mu chu min lo en pahin, "in In dur dur hi chu, a ngaihna a awm lo. Engtin nge 'hetiang luih luih kârah Lehkha i zir theih țhìn le' ka ti alàwm," a lo ti lût nghâl bawrh bawrh a. Ka sîrah chuan duhdah zet hian a lo tluzâl ve a.

"Ka lo riak dâwna nia," a tih chuan ka hnial lo chiang khawp mai.

Thil thlen dàn chu kimchang takin ka hrilh ve vek a, kei ang bawkin mak a tiin a thinrim ve khawp mai, "I pa hi chu a kut a ram thei e, khawi laiah nge a ben che a?" a tih chuan ka bek leh tukkhum chu ka kâwk zauh a, chek tlak tlak chung hian a lo thlêk kual a.

"U Mapuia ringawt pawh chu engati nge neih che a duh ve ngawt a?" a ti leh a, chu zawhna tehhrep chu a ni lo'm ni kei paw'n a chhânna hriat ka mamawh êm êm ni.

"A zahtheihloh lutuk vang bâk a ni lo ang," thinrim zet hian ka ti lêt a. Țhut khâwmna lamah thâwm a awm zui hak avàngin ngawi nghâl hmakin boruak chu kan ngaichâng a; mahse, tu emaw berin a man tam deuh ang a, a lâwm chu a âu hluai a nih hmèl.

"Ka pa hian min tîr lui ngei ngei dâwn tih ka chiang. Kei chu a hrehawm ka ti e, tlânbo daih ka duh," ka ti hap a. Lucy erawhin ngawi reng hian min lo kuah a, "Kha Mapuia kha ka hua, ka haw ngawih ngawih," ka tih lai chuan ka mittui a lo tla tâwp thei. Ka thinrim lutuk hian sawi chhuah dàn ka thiam hlawl loh avàngin ka țap ziah lehnghâl. Mi tam tak chuan ka rilru no vànga ngaiin min zuam sual phah châwk bawk, rilru no mittui leh thinrim mittui chu a inthlau lutuk tlat a ni.

"A chêt dàn a mak ve bawk êm a ni. Engtin nge nang daih daih nupui atân a lo biak theih che le, i pate nên hian an inhre țhìn emaw ni?" a ti a. A âw rì leh hmêlah chuan U Mapuia te lo chêt dàn chu mak a tih ve zia a lang zut zut bawk. 

"An inhre ngai bîk lo.. U Maliani zâwk in a hre thawi ve deuh a. Ka pa phei chuan chuti'n an chanchin sawi tùra hre thui pawh a ni lo. Engtin nge a lo remtih mai theih ka ti alàwm, kei chu min hralh a tum ni berin ka hria," tha nâ zet hian ka ti a. Ka mi hriat chian miah loh pasal ah ka nei a nih chuan rilru hrehawm deuhin ka awm reng dâwn tihte chu 'Pa' a nihna angin a hre thiam tùrah ka ngai; mahse, min ngaihtuahna nei hauh lovin âw a lo pawha, chu chuan sum bâk a ûm lova ngaihna lian tak min neihtîr lo thei lo. 

"Awi, chutiangin mahni fate chu a hralh ngawt bîk lo ang che," a lo ti hlak a. A pa rilru put hmang leh ka pa rilru put hmang inan loh zia a la hre chiang ve tâwk loah ka ngai.

"I pa hian ngaihsak lo chein kut hial thlâk țhìn che mah se hmalam hun țha tak nei la a duh ve tho chuan ka hria," zawitê in Lucy chuan a ti leh a, "Sawi lo teh, ama țanghmà a hai vàng chiaha nih hi," ka ti lêt ve hlur bawk.

"Aih, a chhuah dâwna a thil sawi dàn ațang khân i dinhmun hi a ngaihtuah ve fo țhìn tih a chiang reng alawm. Zu in a rilru a tibuai nasa tawha, amah anga zu in nasa tam zâwk phei chu an rilru a buai a ramhuai hmu țhìn ang hial te'n an awm țhìn hi. Chutiang chiah chuan i pa rilru pawh hi a pângngai tawh lo; mahse, a ngaihtuah ve hlè țhìn che an mahni hi kalsan a, chhûngkaw thar din tùrin a duhpui che alàwm," a lo ti lêt mial mial a. 

"Chu pawh ni se Lucy pasal neih chu ka duh lo.. Ka thiam dâwn lo," rilru ipik zetin ka ti halh a, "Ngawt a che aw, neih a hmain tute mahin an thiam lâwk bîk lo," a ti a, a nui țha bawk.

"Khatin ka thil sawi apiang lo la lâp zêl suh," vîn deuha ka tih chuan nui pat pat chungin min lo kuah leh a.

"Nang hi min hre chiangtu ber i ni a; mahse, min hriat thiampui phâk loh chin a ka rilru damlo nasa lutuk hian min ei chhe tawh lutuk. Ka tân chuan pasal neih chu phur rit mai a ni dâwn. Fa neih a lo duh phei chuan," rilru ipik zeta thawk la kâwk in ka châwl dat a. Fa nei tùr ang a suangtuahna ka hman rual ringawt paw'n ka hah, ka ipik a, ka mitthla ah chuan ka țhan len chhoh dàn bâk kha ka hmu thiam lo.

"Aaaa... Lucy, tlânbo dàn min ngaihtuah pui mai teh," tih thlâwt pahin ka țhu chhuak a. Ka mut zangthal lai khân ka âwm chhûngah hian eng emaw ni hian min lo hnawh tlat a, ka hrawk chen thlenga lo hnawh chhoin ka thâwk a chham mai dâwnin ka hria.

"Hahdam teh, hun a la awm alàwm" a lo tih chuan, "Naktûk hi Sunday a ni a, kârleh chu a ni zui mai dâwn asin," vîn zetin ka ti hlur a. Ka thâwk a zîn lutuk na lamah thlanin min bual lo chauh tawh.

"Rilru i tibuai ê," a ti nang nang a, ka rilru hi a buai daih zâwk.

"Innei phawt u la," a han ti dêk dêk chu a sawi zawh hmain rum deuh hian ka lo melh a, "ka sawi zo phawt dâwn alàwm. Innei phawt u la, indanna ei char char bawk la. Chuan, pawisa i khawl ru bawk ang a, i khawl ngah deuh hunah sum i chhuaha nga, in inah hian kir leh tawh kher lovin eng emaw te i training nghâl daih ang a, Airhostess te pawh," a tih chuan melh rum viau mah ila chu aia țha ruahmanna dang ka nei bîk chuang hauh lo.

"I sawi tawh tho kha training na tùra inkhawl hmasak i mamawh tho sia, Mapuia hi sum siam nân chuan hmang tawp mai rawh," a ti leh zêl a.

"Tlânbo kha chu ngaihtuah duh suh Hriat, ka sawi țhaih na che a ni miah lo. I pate hi chuan an lo ûmzui kher lo ang che; mahse, inenkawlna tùr sum thawh chhuah a ngai dâwn a. Sum mamawh luat avàngin i duh loh dàn deuhin i tâwp palh ang tih ka hlau. Chuvàng chuan pasal chu nei la, inkhawl nghâl char char la, i inkhawl ngah hunah i chhuah san daih dâwn a nia." 

"I sawi ang ngawt hian ințhen theih ta silo se," ka lo tih ve chuan, "Awi.!! tun ang laiah chuan hmeichhia te hian thil tih theihna sâng tak kan nei tawh alàwm. Ințhen i duh hunah a hnial che a nih paw'n, 'ka pasal mah ni se ka duh lo chung min khawih lui' tiin case ka siam sak dâwn che ti la, a țhen lo ngam teuh lo che," a ti zui ham ham a. Thâwk a ven phah lo chiang teh asin.

Kan țhian duna duhtâwk a thil kan sawi zawh hnu chuan mahni phone ve ve khawihin kan inbe zui tawh lèm lo. Message a lo lût a, chu pawh number saved loh ațang leh nghâlin.

*ka number hi lo save rawh* tih ngawt hi a ni a. 'Tu nge maw ni le?' ka tih rilrûk rual chiahin 'Mapuia' a nih rinna chu ka nei zawm nghâl zat. 

*Tu teh ngawt nge?* ka ti lêt a, ka text chu voice ni se chuan a vîn ngawt ang.

Ka rin lâwk ang ngeiin, *Mapuia* a lo ti lêt a. Ka rilru chuan, 'Zahnatlachhampa' ka ti a.

*Ka mihring hriat tawh zawng zawngah zahna i la tlachham ber* tih chu ka thawn a, ka haw lutuk tih hi inhre ngei ngei se la ka duh.

*Text a inbiak hi ka peih vak lo, kan inhmuh leh hunah hmaichhan ah kan sawi dun dâwn a nia* a lo ti vei duah a. Ka thinrimna reh deuh tawh kha a lo chawk tho leh chiang viau bawk.

Tho chhuak hluaiin a message tùr chu ka type leh nghâl a, Lucy pawh lo țhu vein kan in text na chu a lo bih ve nghâl zat bawk.

*Naktûk ah lo kal la* tih ka type lai chuan ka thinrim bawk si nên send na ka hmet palh a, ka type belh leh lai tak in, *Zànin khân min hmu kham hman lo em ni?* a rawn ti a nih chu! Lucy chu a lo nui hak a. Kei erawh ka thinrim lutuk chu ka sa vek thei. 

*Thisensangpa, naktûk ah lo kal la ka pa bulah hian min neih duh loh thu lo sawi leh nghâl rawh, i sual em mai! Engati nge ka rem tihna la hmasa miah lo a ka chhûngte zâwk i lo biak hmasak a. Ramhuai i nih hi, Sakawlh pawh!* tih ka thawn leh laite chuan Lucy chu a lo nui char char a.

Ka message chu a chhiar tih hriat takin a in blue tick a; mahse, *i duh leh Ramhuai pa tiin ka number kha lo save mai rawh* tih zawngin min chhâng lêt a nih chu.

A message Lucy'n a hmuh veleh lek phei chuan a nui chhuak ta hawk hawk a, insehruh țeuh a rum fahran a ka en laite chuan, "Thinrim êm êm a i biak laiin ani lah chu a lo thinrim ve duh mang si lo a, in nuihzatthlâk êm alàwm" lo tiin min nuih kiah kiah a. 

*Ka save bawk lo ang che* ka ti lêt a.

*I thinrim viau a ni maw?* a lo ti daih, amah vàngin ka pa'n kut hial min thlâk tihte pawh a hre tawp nang.

*Ka thinrim a, ka haw êm êm bawk che* ka tih lêt laite chuan ka thâ a za vek tawh.

*Ka la thawi dam sak dâwn che alàwm,* tiin min lo chhâng lêt a. Phone chu bang vawm nân ka hmang lo chauh!

*I mumang a nih chu, ka dam chhûngin ka haw reng tawh ang che* ka ti lêt a, min lo chhàn lêt lehna pawh nghâk tawh lovin phone chu ka switch off nghâl daih bawk.

Lucy lah chu a nui țha reng a, ka melh châng apiangin hmui a chîp vei hmàn zêl bawk nên ka melh rum țha khawp mai.

Chutihlai chuan zu lei duh an awm a niang pindanah u Maliani chu a lo lût ve a, zu dah țhatna ațang zu fun a lâk chhuah rak rak laiin Lucy chuan, "u Malian u Mapuia te nên chuan in inhria em ni?" a lo ti a. Țul lo ti deuhin ka melh nâin min en duh lovin Maliani chu a en lui ve tlat bawk.

"Inhre țha lutuk chu kan ni lo; mahse, an chhûngkua hi an fel a, veng chhûnga khawsak harsa zual deuh te hi pawisa bâkah Bufai leh Tel eng i lo vêl pe in an tlawh kual țhìn a, chungte ațang chuan ka lo ral hriat ve tawp," a ti mial mial a, zu fun chu a kawr hnuaiah a hnawh lût mawlh mawlh bawk.

"Kum engzat vêl nge a nih ve tawh ang le?" Lucy bawk chuan a ti leh a, "A la upa lutuk bik lo ang, 34 35 bawr vêl a ni maithei," a tih leh lai chuan ka lo ner nasa khawp mai.

Lucy pawh chu a ngawi zui ta vang vang a, U Maliani chhuak mai tawh tur chuan, "Lucy, i țhiannu kha lo sawi phûr pui deuh rawh, kei chuan Mapuia hi nei ngei se la ka duhpui viau a nia," a ti a, a nui pah var var bawk. Maliani kal chhuah hnu chuan, "Ani pawh hian a duhsak ngawt mai che," a ti deuh ringawt a.

"I ninawm, engati nge a chanchin te kha i lo zawh vêl thawt thawta?" ka ti kha kha a, nui țha chungin lu a thing mai a, "Innei ngei ngei u la a ni mai," ti pahin a mu leh nghâl a. Rilru ipik a va han ti zual chiang tak aw.

"U Maliani hi a sual miah lo tiraw?" zawi têa a lo tih leh chuan lu ka bu nghat ringawt. Nuhrawn dangte'n an fahrawn te an nin lutuk vànga hnawh bo dàn ngawt an ngaihtuah ruai țhìn ang rilru a pu ve lo tih ka chiang a, tlangvâl dang a riahpui zauh zauh țhìn bâk a dik lohna sawi tùra awm lo. Chu thil pawh ka pa hi rui reng lo se chuan a thlentîr bîk kher in ka ring lo.

Zànlai ah chuan tui takin ka țhiani chu a muhîl sak sak a. A hmai lo zar buai tu sam chu hui kian sakin ka nui sak bawk, a hmêl hi a Korean hmeichhe hmêl țhat reuh tlat a, a hnâr ngûl hi amah chuan a lian mah mah a ti țhìn; mahse, a hmêl ti lang fiah zual tu a ni a, a hmêl țhatna a belhchhah zâwk ka ti. Keimah ang lo takin sam a zuah sei ngailo a, Wolf Cut hair style a pu a, a inhmeh in a ti lang changkâng riau bawk. Kei aiin a sa a pan zâwka, a sâng deuh zâwk bawk. Ka hringnuna thil thleng zawng zawng deuh thaw min hriatpui tu a ni a. Min hriat thiam ang hian tu mihring dang mahin min hre thiam ve lo ang; mahse, ka zawng zawng deuh thaw a hre ve vek chung paw'n a tuar ve miau lova, chuvang tak chuan min hre thiamtu ka neih awmchhun pawh hian ka rilru chhûngril tak hi a hre thiam phâk lo țhìn; mahse, an chhûngkua hi ka tawng lo ang tih erawh ka hlau viau thung.

Pâwl kua ka zir laiin țhan thì ka nei a. Hmeichhia te taksa inthlâk danglam chhoh dàn chu mite sawi hmang ațang lo hre ve nual tawh mah ila, khatia ka han hmachhawn meuh kha chu ka chîâi a. Ka nu bulah phei chuan ka sawi ngam lo hrim hrim.  

Ka hnute ûm țantîr ngawt pawh khawvêl pian ken a ni tih lam rêng hre thiam duh lovin, "I lerh hma lutuk a nih hi," min ti zêk mai a. Ka taksa inthlâk danglam chhoh dàn kha hrilh ngamin a khawsa ngai lo a ni tawp mai.

Țhan thì ka neih ţum pawh chuan hlauthâwng deuhin Lucy te inah ka han tlãn chho a, tûkțhuan an lo kîl mêk a, hlauthâwng lutuk a an ina ka tlàn lût hlawl kha, a nû nu Zarpuii'n min lo dawngsawng a, ka vawi khat tawnna a la ni bawk si nên a ruh lang rãwt khân ka hrilh a. Min nuih miah lovin an Bathroom-ah min kai lût sawk sawk a, "Ka kekawrtê ah pawha kai vek tawh," tiin kei lah chu ka khùr ka khûr tawh mai si.

Nu Zari chuan, "Lo phelh la, Pads ka va la ang e," a ti a. An dàwra an  zawrh lai chu min lâksak in Lucy tâna a pantie lei sak a la hâk loh pakhat chu a lo keng tel a.

Towel veng țât a ka lo ding zum dâk kha Pads hman dàn min zirtîr a, " Dârkâr thum danah thlâk ngei ngei tùr aw. School-ah pawh i pai zêl ang a, i hman hnu chu i roll ang a, lehkha phêk in i tuam ang a, i paih zêl ang," tiin min hrilhfiah thlap a. Zàna hman tùr a sei deuh chi te nên an zawrh lai chu min pe țeuh bawk, Lucy-i'n țhan thì a la nei ve loh avànga hlauthâwng zual êm êm kha ka ni pakhat bawk. Ka țhan thì neih aţang tûn hnu thleng hian nu Zarpuii chuan a thlâwnin pads min la pe ta zêl bawk a. An chhûngkua chu Ka chhûngku ve ai daih pawhin ka ring ngam zâwk a, ka tân an hlutna chu tehkhin tùr dang a awm lo.

Ka têt lai chuan ka rilțam vàngin chhûn lamah țhenawm khawvêng te Inah ka leng kual nasa țhìn lutuk. An chhûn Thingpui in lai a lo nih fuh palh chuan min intîr ve ka beisei vàng a ni țhìn, khatia ril țâm deuha țhenawmte ina ka lêng kual ţhìn kha 'naupang kâwlhrâwng' tih ka hlawh phah a. In țhenkhat ah chuan thingpui min intîr ve beisei deuha an TV ka en luih tlat laite kha, "Ahriat, i nute'n an lo zawng palh ang che, hâw tawh rawh," min ti a, an chhûn thil ei hun tak takah chuan min hnawt hâw daih zêl.

Lucy te in leh kan in hi a inhlat deuh a, chumai bâkah anni mihrang daih tân kei kha min lo buaipui reng ngaihna a awm bîk si lo a. Chhûnah ril țam deuha ka lêng kual țhìn te pawh an lo hre lawk lo a.

Țhenawm nu țhenkhat te'n "Ahriati lah hi a kâwlhrâwng si, naupangtê si hi mi inah a vak kual den den zêl a. Misual in an la rubo daih a nga ti nia," tia an fate nên kan inkawm chânga ka chanchin an sawi zui kha Nu Zari chuan a lo hre ve ta aniang. Chumi țum aţang chuan Lucy nên kan inkawm lai ni lo mah se, chhûn thingpui in hun a nih tawh chuan Lucy hi a lo tîr thla vang vang zêl a.

"Ahriat, A nu in ei tùr a siam a Ahriati nên in ei dâwn nia a ti a. Kan Inah lo kal rawh," ti a min rawn koh țhìn khân hlim deuhin ka ûm dàwr dàwr zêl.

Nu Zari'n kan ei tùr a siam te kha a ei duh loh zâwng a nih chuan a sawisel páng páng zêl a, "Chhang ka duh lo Wai wai chhum ka ei duh zâwk," tia Lucy-i'n ei tùr duh zawng a thlan chânga a nu in kut thlâk miah lova a ei duh zâwk a pe thuai țhìn te kha ka tân chuan thil mak lutuk a ni a.

Duh a thlan theih bîk avàngin Lucy dinhmun chu ka awt êm êm zêl, kei chu ka ril a țam ngawih ngawih lai paw'n, "A nu thil min lo lei ka ril a țam ê," ka ti dêk dêk te kha ka chalah min bêng lawlh a, "Vir lutuk suh, thil lei ngen reng mai," min ti zêk a. Nute bula ril țam thu sawi te kha 'bèn hlawh chhuahna' anga ka ngaih laiin anni chhûngkuaah chuan a lo ni ve miah si lo te kha ka mak tih tâwka tling êm êm zêl.

Țhenawm nu țhenkhat te sawi ang tak tak khân nu Zari te chhûngkua hian min tuam hlawm vat lo se chu, ka naupan lai khân mipa sual deuhte ka tawng fuh ang a, Ril țam vànga chhûn reh laia naupang vak vak kha chu ei tùr hmangte in min thlêm ang a; Min pawngsualin min that daih thei tih pawh nîkhua ka hriat deuh tâk hnuin ka hre thiam ve ta zêl a. Ka tân chuan Lucy te chhûngkua hi min vênghimtu Angel rual ang mai an ni.

Zîngkâr a ka harh chiah chu awm nawm lohna hian min vilh nghâl a, ka lungphu lah a su nghâl dup dup bawk nên hmai hupin thâwk ka la vang vang a. Nizàna u Mapuia hmêl lan dàn kha mitthla ah a lo lan leh lek phei chuan ka thâwk lak a tãwi vek thei. A palian in a duh phawt chuan a kut thlâk a na dâwn si, innei ta i la ka pa ang bawka zu ruih hmang a nih ve phei chuan kut min thlâk fo ang a, ani pa lian leh tha châk lutuk kut tuar chu thihna tluk hial a râpthlâk a nih ngei ka ring. Ka ngaihtuahna te avàng chuan thaw chham lo chauhin ka țhu chhuak a, suangtuah pawh ka lo suangtuah ngai loh chu ka hmachhawn dâwn ta mai chu a ni a. Ka hlauhthàwn tluk zetin ka rilru chu a hrehawm a, ka awm nuam lo nghulh chuan min ti damlo thei mai dâwnin ka hre hial bawk.

Phone ka switch on leh chuan u Mapuia number ațang khân message a lo awm leh vá a. Ner nak chungin ka hawng ta tho.

*Naktûk zànah kan lo lêng leh ang* tih hi a lo ni a. A enga mah hmain ka thinrim leh êm êm tawh.

*I zakthei lo ê, in lo lêng a nih chuan ka pa bulah min neih i duh loh thu sawi nghâl bawk ang che, ka hre ngai lo che a, pasal atân pawh ka duh lo che. Engati nge hetiang hian i lo awm ngawt a, ka nun hrehawm tawh sa lutuk i lo belhchhah tih inhre rawh* ka ti lêt a. Zîng dâr 6 êm pawh a la rîk loh avàngin a hmu nghâl kher pawhin ka ring lo.

Mahse, chu Sakawlh Pa chuan a deliver rual rualin a seen a, thei ngat i la chu phone chhûngah hian lût ve i la a phone screen zen tlanga, a hmaia ham nghek chu ka châk tak zet a ni.

*Zîngkârah pawh i zaidam vak chuang lo a ni maw?* a lo la ti lêt ngam nia! Awi! Ka haw ê... Ka haw let tawp tawp!

*Zaktheilo tih țawngkam aia Zaktheilo sawifiahna dang awm se ka ti ngawt mai* ka tih lêt leh chuan, *Over plus a niang* a lo ti ve leh zêl a. Ka thinrim leh hlur tawh.

*Eng nge i hriat a hetia i awm tlat a? Ka lak ațang hian eng nge i duh?* ka ti leh a. Call a àn khum hrep mai te chu ka duh tut tut tawh.

*Nangmah kha ka duh* a lo ti lêt zet chu ka alh chhuak pup hial dâwnin ka hria! Chhàn lêt chhàn lêt chi pawh a ni tawh lo. Kan pahnih chiahin hmaichhanah sawi dun thei ila, duhtâwka àn khum hrep ka duh.

*Khawvêl ațang hian bo daih la, lo lang leh tawh ngai suh,* tih chu thawnin phone chu Lukham hnuaiah ka rawlh lût hmak a. Lucy lo harh chuan zi mar țalh ţalh pahin Lukham hnuaia ka Phone dah chu a ban zui a," Zìng zîngah engati nge i insawh tauh sawk sawk a?" a lo ti țial ran bawk.

 

"A zaktheilo êm a nih kha" ka tih hlur laiin a lo nui hak a, ka Phone lock chu hawng nghâlin u Mapuia nên kan inbiakna chu a chhiar ve lehnghâl a, "Hei a message hi i reply dâwn em?" hàm hawk paha a tih chuan, "A teuh lo!" ka ti lêt hlur a.

Nui leh hawk pahin ka Phone chu a bih ngar ngar a, a tâwpah chuan nizàn ang bawk khân a nui leh kiah kiah tawh, "Zîngkâr ațang in han inhnial leh nghâl ringawt mai a aw.. Innei ula in inkawp rem phian dâwn hi," a tih chuan ka melh rum țha khawp mai.

"Ka ti tak tak alàwm, nupa te pawh hi maw thil ho tê têa inhnial reng țhìn te hi awm hrang thei lo leh inngai êm êm te an ni daih zêl," a lo tih leh chuan ka chhâng lêt tawh lo. Lungawilo deuh chungin ka thawh san daih a.

Pindan aţanga ka chhuak chiah chu rilru ipikna ti zual tùr tingin Inchhûng chu a lo hnawk râpthlâk bawk si. Chhuat laiah chuan Zial bung leh an Kuhva ei na sarang leh Chinai awmna Pan-hnah them a lo let rum a, thâwk la hawkin chhuat laiah chuan ka ding deuh vang vang a. Ka rilru kil khat ațang chuan, 'Pasal chu nei daih rawh, he Inchhûng boruak hi i ning ngawih ngawih a ni lo'm ni, chhuah san hlen vang vang rawh' ti a min lo hrilh tu hi a awm a. Hmai hup thak paha thâwk ka lak leh vak tâkah chuan ka thinrim lutuk pawha ziaawm deuh a. Hetianga Inchhûng hnawk niai nuai hi ka vawi khat hmuhna pawha ni lo, ka thinrim phah ngai lo a, țha takin ka phiat fai nghâl mai zêl. Tûkin tehhrep erawh Sakawlh pa vàng phiangsen khân ka thinur a, chuvang chauha kan Inchhûng hnawk pawh thinrim pui ka ni.

Hmun hnawk ka phiah fai hnuah Bathroom-ah ka lût a, ka zo fel Bathroom ațanga ka chhuah leh chuan Lucy pawh chhuat melhin a lo țhu ngawi vang vang a. Zîngkâr mood a pe chhe ve țhìn asin aw.

"Ka zo tawh, va zung ve rawh," ka tih chuan khap hlei lovin lu a hiat sat sat a, "Zànin ah an lo lèn leh chuan ka lo awm ve ang aw?" a lo tih chuan ţawng zawi tùrin ka khap rang khawp mai, ka pa in kan sawi dun tih hre lo se ka duh.

"A ngai lo, kei pawh in inah ka lo lêng daih dâwn, an duh leh lo lêng se la ka pate nên inkawm rawh se," zawi si vîn zetin ka ti hlak hlak a, "Awi! i ti mak thei e!" a ti nang nang a. Nupui atân min lo biak ngawt dàn ngaihtuah chuan ka la che mak sak lo zâwk alàwm le! Engtin nge kei kher hi nupui atân min duh theih. Ka chhûngte hi engti tih a lo be ve ngawt nge a nih? Zawhna chi hrang hrang chu ka inzawh chhunzawm leh nghâl a.

A tâwpah Lucy bulah chuan țhu vein zawitê hian, "Mak i ti ve em?" ka ti sar sar a.

"Eng chu maw?" a lo ti hû thung, "Aw.. U Mapuia awm dàn hi maw le, kan inhre ngai miah silo a, tihian thâwk leh khatah a nupui atân min duh thut a. Min hre chiang bawk silo. Hetia a hriat chian miah loh nupuia a neih duh rum rum na chhan tùr ang hi i ngaihtuah ve em?" ka ti leh sar sar a. Pindan ațang ka pa a lo chhuak ang tih hlau deuhin kawngka lam chu ka melh zauh zauh bawk.

"Aw.. U Maliani'n kum 35 vêl a ni tawh ang a tih kha, nupui neih a hun ve tawh êm a, a hmanhmawh aniang chu," a ti a. A va han mangan thlâk tak aw!

"Chutiang vàng ngawt a nih ka ring lo," ti a thâwk ka lak halh chuan, "eng rin dàn nge i neih a?" a lo ti ve a.

"Kohhran upa uapna hnuaia seilian a ni si a. Hnam dang emaw a chhûngte pawmpui loh deuh tùr ngaihzâwng a nei ang a; chumi thup nân chuan min hman a tum a niang," 

"Awi, i ring mak thei e. A nau hmeichhia paw'n hnam dang a nei tho alàwm, hnam dang neih phal loh vànga nang daih daiha neih ngawt nachhan tùr a awm lo," a lo ti bài bái a, "Hnam dang kher lo Mizo ah pawh a chhûngte duhpui loh deuh nên an inkawp ang a, chumi hliah khuh nân min hman an lo tum reng thei," ka ti ve tlat a.

"I ti mak thei e, chutiang te chu movie-ah leh thawnthu ah bâk a thleng ngai lo," a ti a, "Haw lo la, tihian zu zuar fanu i ni tih chu a hrelo tùra kan rin te paw'n an lo hre vek zêl, Mapuia te paw'n an hre vek dâwn, zu zuar fanu aia duhpui loh tùr khawpa dinhmun chhe danga awm dâwn chuang em ni? A chhûngte'n nang neih che an rem ti a nih chuan mi dang pawh an rem tih loh nachhan tùra awm lo, chuvàng chuan mi dang nên an inkâr thup na atân chuan a hmang miah lo ang che," a ti a.

"Ka îp rei tawh lutuk ka cheh dâwn" ti pahin a tho thut a, Bathroom lamah a tlàn phei zui chawn chawn a.

A lo chhuah leh lai paw'n ka țhutna ngaia țhuin ka lo ngawi veng veng a, "khawi maw i towel kha ka lo hmang ve mai teh ang," lo tiin ka towel bah lai chu a rawn pawt thla nghâl zat bawk.

"Khati khân inngaihtuah veng veng suh, i ipik zual mai mai ang," a tih leh lai chuan en chhovin ka nui sak ringawt.

Chutih mêk laiin pâwn lamah chuan thâwm a lo awm khat khat a. Lucy nên chuan kan in melh zui hra a, "Ruang an chhar an ti," tih rî kan hriat tâkah chuan rang zetin kan tlàn chhuak ve nghâl a. 

Vêng chhûng mite pawh ruang chharna hmun ni àwm tak lam pan chuan an tlàn sup sup a. Kawngkapui khàr rawk rawk pahin Lucy chuan, "Kal ve ang," a ti a. Hmanhmawh deuhin mi dangte chu ka zui ve nghâl a. 

Kan in ațanga hla lo têa kawng pêng lo awm ah chuan an tlàn thla sup sup a, kan zuk thlen ve meuh chuan mipui chu an lo tam tawh hlè a. Ruang chu puan tal pawha an lo la khuh hman loh avàngin ka zuk hmu chiang khawp mai. 

Mipa a ni a, zu a in nasa hle tih hriat takin a taksa chu a lo vûng puam ul a, tho tle an lo thlâwk luai luai tawh bawk nên Kopang nghènga a țhu meng kur chu hmuh a hrehawm ve tak zet. 

Patling chinchâng hre deuh chin chuan, "zu chhia a in vàngin a pum na a tuar zo lo a nih dâwn hi," an ti a. Nutling pakhat puan lo ken chuan a taksa chu an khuh zui nghâl a. 

"Police in call tawh em?" 

"Vêng chhûng hruaitu lam lo thleng kim phawt se kan ti a nih kha," 

"Tun hnaiah ngawt pawh kan veng chhûngah ruang chhar a tam ta malh malh hlè mai," tih ang reng te chu a ri nuaih nuaih a. Zu chhe in vànga Mizo mipa dang kan chân leh ta chuan ngaihtuahna a ti kal thui khawp mai. Kum tin mai hian mipa nau piang an tlêm telh telh laiin mipa thi an tam tulh tulh bawk si a. Tûnah rih chuan a nghawnga la lang lutuk lo nâin, kum 10 vêl han vei leh chiah se kan ram hmêl hmang a danglam dâwrh ngei ang. 

"Nu Dini te ina zu in țhìn kha a niin ka hria," Lucy chuan a ti sar sar a. Zu in a taksa a hmeh puam nasat bâkah, a vun a dum hul bawk si nên kei chuan tu nge a nih ka hre ve mai thei lo. 

"Hâw teh ang," ka ti sap a. Hetia ruang bula lo awm ve reng chu a țulna a awm pawhin ka hre lo, "Awi, la awm ve rih ang, an rorel dànte hriat ve a châkawm alàwm," ka țhiani chuan a ti deuh tlat a. 

Dik taka sawi chuan tûn hnai hian kan vêng chhûng bîk ah ruang pali ngawt chhar a ni tawh a. A tirah chuan veng chhûng mipui te pawh kan phâwklèk ve deuh a. Tûnah erawh ngai ah neiin hmuhnawm thlìrin kan thlîr a ni mah tawh zâwk. 

Ruang bula awm zîngah chuan zu zuar ve tho an awm nual a, lo inhnial nak nak tawk pawh an awm, țhenkhatin, 'zu chhia ngawt chu hralh tawh lo teh u, tihian vêng pumin kan hmingchhiat phah leh dâwna nih hi,' an tih laiin a lehlam lahin zu chhe zuar nih chu an lo duh bîk hauh silo a. Inhnial bap bap reng mah se țawng huai ngam tak erawh an awm lo.

Rei lo tê hnuah Police lam pawh an lo thleng a, thu zawhfiah zîngah kan tel ve mai chu hlauin Lucy chu ka hâw luih pui ta daih a. Vêng chhûng mi tin chuan an ruang chhar chungchâng ngawt chu an lo sawi sup sup a; mahse, tûkțhuan ei kham ah meuh chuan tute mah hian an sawi zui peih tawh lo ang tih lah a chiang.  

"Tikhân țhenkhat chuan kan vêng hi min lo dem leh vak ringawt ang a," a ti bai bai a. "A tu tak tak mahin kan ngaipawimawh leh teuh lo," ka ti ve thuai a. 

"Kan vêng thiam loh pawh a ni bîk lo alàwm tiraw," A han ti leh a, ka lo nui hak chu ka bân a lo kuah a, "vêng dang daih ațangin zu in turin an lo kal a, in chin tâwk hre miah lovin an birh tluk tluk a. Chaw kaw puar ei si loin zu ngawt an rawn tlân a, vêng mite tân lah vakrawlai apiang lo châwm zêl kha thilh theih a ni vek bîk silo a. Mahni taksa in a zawh loh chin chu in lui hlawm lo sela țha mai tùr," a ti barh barh reng a. Mitthi chhûngte lam in an lo hre palh reu reu ang tih a hlauhawm.

"Zu hi chu a huatawm êm a ni, engtin nge an in peih reng zâwk le," rilru ipik zet in ka ti a. Kan zuar a, ka pa lahin a ngawl a vei bawk. Kan chhûngkuaah ringawt pawh Zu hnathawh țhat loh zia chu a lang chiang êm êm a. Rilru hah chhâwk zangkhai tu ah ka hmang te hi an ti thla zen a. Chhâwka hnehin an mimal nun bâkah chhûngkaw nun thlengin a tuar phah a, hahdamna chu a awm hlawl lo maw le. 

In kan han thlen chhoh leh paw'n ka pate chu an lo la tho lo a. Inchhûnga ka lût chiah chu nizàna u Mapuia te lo lèn chhan bawk kha ka ngaihtuah chhuak a, rilru ipik deuhin thâwk ka la nghek ringawt. 

Thingpui ka chhuan lai paw'n u Mapuia'n min neih a duh chhan tùr awm ang chu ka chhut kual reng a. A châng leh ani mihrang daihin kan vawi khat inhmuhna ațang ka nun a sawi danglam nghâl vek mai chu haw tharin thâwk ka la leh nghek zêl bawk. Hmaichhanah inhmuha sawifel chu kan ngai tak zet a ni. Hetiang teh ngawt hian ka inpalzam tîr mai mai tùra ni lo.

Lucy erawh a dàn ngaite in Spotify a ngaithla a, sak pui al al pahin thingpui siamna tùr no-pui chu a lo ban ve a. Chutihlai chuan vîn zet mai in ka pa chuan, "In Phone a rîk a rîk chu, ngaihsak ta che u," a rawn ti khur khur a.

Pindan ah Phone ka kalsan tawp tih in hriain rang zetin Pindan lamah chuan ka tlàn lût nghâl a. Min lo call tu hming lo lang ka hmuh chuan mak tiin ka meng deuh kâwk bawk.

Chhàn loh mai ka tum zet nâin 'min lo Call ngai si lo a, thil pawimawh a awm a niang' ti leh siin ka chhâng a, "Hello" ka tih chuan lehlam thâwm chu a reh vung vung a.

Pindan aţang kal chhuak pahin, "Hello, David i hre thei lo em ni?" ka ti mawlh mawlh a, Lucy pawh ka țawng rî avàng chuan mak tih hmêl deuh hian a lo hawi hû a. Zîng zîngah David-a hnen ațang Call ka dawng chu a mak bawk êm a tin ni.

"I hre thei em?" ka tih leh chuan, "Ahriat" zawi ang reng tak hian a rawn ti dût a, "Aw, engati nge min lo call a, thil pawimawh a awm em ni?" ka ti lêt a, Lucy paw'n David-a thil lo sawi tùr chu hriat ve loh hlauh hmèl zetin ka beng bul chêt ah a lo awm hnai ve nghâl zat bawk.

"Awm hran lo e," a ti a, a nui zui hak bawk, amah vêk chuan, "Ka lo call tih pawh ka inhre lo" a ti leh a, "I pick up ka ring chiah lo a," zawitê a nuih pah hian a ti leh bawk nên, a thil sawi chu eng ber nge rin tur pawh ka hre thiam lo.

"Chuan?" ka ti lêt ringawt chu Lucy chuan min lo ner khum chiam zui.

"In hâw tawh em ni?" a ti chu ka bo hû hman nâin Tuipui D a kan awm laia kan thlalâk te kha status ah kan hmang chuai chuai a, a lo hmu ve vek tih ka hre thiam leh hnuhnawh.

"Aw, Nimin khân kan hâw leh tawh a, nangni hun in hmang nuam em?" ka ti lêt ve luam a, amah paw'n nizàn zân rei lam tawhah in an thlen thute chu a lo sawi ve a. A tâwpah chuan, "Kârleh ah hian chaw ei khâwm an rawt leh a, i lo tel ve tawh ang chu tiraw?" aw kî hniam deuh hian a lo ti a, chuthil leh bawk pawh chu a!

Hmui phunin Lucy zawk chuan, 'âw ti rawh' a lo ti a, "Vid, ka lo tel theih ka ring lo," ka ti daih chu Lucy chuan min melh rum khawp mai. Thingpui siam turin a inher hmak a, David-a thâwk la ham ham rî pawh ka hria.

Zawi ruih hian "Ahriat" a lo ti a.

"Ka lo kal ve thei dâwn lo tak tak, duh leh Group lamah pawh ka lo sawi mai ang," ka ti zung zung a. Amah pawh chu a beidawng ve tak tak tawh a niang, min sâwm lui tawh bîk lovin phone chu a dah a.

Lucy chuan, "engati nge chaw ei khâwm leh zêl pawh i hnial tlat a," tiin min lo hau nghâl hlak hlak bawk. 

"I theihnghilh tawh em ni?" rilru ipik deuha ka tih chuan min chhâng lêt tawh lovin hmui a ti pawrh tarh tarh a, "Kârleh hian eng thil nge a lo her chhuahpui dâwn pawh ka hriat loh hi," ti zui hlak hlak in no-pui a Thingpui chu ka no tùrah ka inthlit chhuah pah a.

Tûk dang ang lo takin ka pa pawh a rawn tho chhuak hma ve khawp mai, kawr pawh ha lovin, "Ruang an chhar leh em ni?" a rawn ti țeng chuaih a, a mit te chu a sen rûm bawk nên a hmêl hmuh chu a hrehawm tak zet. 

"Aw.. Nu Dini te ina zu lo in țhìn pakhat kha a nia.. A hming an sawi kha ka hre tawh lo," Lucy chuan a lo ti zat zat a. Ka pa pawh chuan, "A zialo țhìn ngawt mai," a ti ve ngial a.

Bathroom pana a kal chu ngawi reng hian ka lo thlîr a, nizâna Lucy thu sawi kha a dik zia ka hrefiah tulh tulh bawk. A rilru put hmang mai pawh ni tawh lovin hmuh theih khawpin a taksa pawh a chhe tel tawh, a zu in hunbi ah a in loh chuan a thâ a khùr dur dur zêl a. A thinchhiat tawh sa tehlul nên a thinchhiat a zual phahin a kut a ram zual êm êm bawk.

Țhingpui in tùra dawhkàn a lo kîl ve lai te chuan a ţhing rim a nam rum rum a, amah ka en ka en hian u Mapuia te nên an lo inhriat ngawt dàn tùr àwm ka hre thiam lo zual tulh tulh bawk.

"Lucy, Nizân chu hetah i riak a ni maw?" a ti a, a rui lo hai lo țawng rî pawh hi a thinchhe khamchhuak zo vek tawh. 

"Umm, Card in den luih luih laiin ka lo luh kha min hmu nange?" Lucy paw'n a ti ve mai a. Tãwi tê a nuih pahin thingpui chu a dawt khalh a; mahse, a pum lamin a lo zo silo a niang a uak deuh tuarh a. Luak erawh a luak bîk em lo.

Chil rial ni àwm tak hian a tep chuap chuap a, Lucy zâwk chuan, "Pa Fal zu hi in in tawh lo teh, i inrin hma hian i thi thut mai ang e aw," a ti pek a. Ka pa chu a nui zui hawk a, "Lallucy țhìn hi chu aw" a tih chuan, "Lallucy min ti ziah suh, ka hmingah Lal a tel lo," Pakhat lah chuan a ti ve bawk a, ka pa chu a nui ve huah huah reng mai. Tihian mi dangte awm lai chuan pa țhapui ang mai hian a nèlawm ve viau zêl. Chhûngkua leka kan awm châng erawh chuan kan thâwk la rî mai mai pawh a haw ta mai emaw tih tùr khawpin a țeu hlur zêl si.

Thingpui chu a pumpui lam zâwkin a ti thei ngang lo a niang, a no chu thawhpuiin sil hmunah a leih baw vek a. Pindan ah a lût nghâl a, a zu dahna va hai ruk ruk pahin u Maliani la mu chu a kai tho zui khur khur bawk.

Zu bûr nên a lo lêt leh chu Lucy bawkin a lo khak hlak hlak a, a haw lèm lo niin a lang, nui sun sun pahin a thli chhuak a. Zu zâwk pawh chu a lem tirh chuan a uak pui tuarh tuarh tho, u Maliani lo tho in Bathroom a hman lai chuan, "I țhiannu hi i hrilh ve tawh em?" ti pahin min lo en a. U Mapuia chungchâng kha a nih hmêl.

"Hrilh tawh. Mahse...." ka ti chu Lucy-i'n min lo pawtchat nghâl a, "Pa Fal, Ahriati pasal tùr kha i mi hriat chian a ni em ni?" a ti zui zat bawk. 'Inneih ka duh lo thu' ka sawi chuan ka pa hian kut min thlâk leh mai a hlauh vàng a ni maithei.

"Hre chiang lutuk bîk lo e; mahse mi țha a ni ang," a tih lai chuan beidawnthlák ti fê hian ka lo melh ngawt ngawt a. A mi hriat chian ni miah lo min neihtîr a tum ngawt chu a ngaihsam thlâk ka ti dâwn nge, a dâwn thui loh thlâk ka ti zâwk dâwn pawh ka hre lo ve a!

"Awi, i ti mak ve ê.. nang pawhin i hriat chian miah loh chu i fanu hian nei se i duh a maw?!" Lucy bawk chuan a ti leh a. Ka sawi ni se chuan kut min thlâk tawh hialin a nia ka rin.

"Ti mak lo ve, i țhiannu tâna țha ber tùr zâwka nih hi. Nang paw'n lo fuih ve rawh,pasal neia nuamsa taka a khawsa duh a nih chuan Mapuia hi a nei ngei ngei tùr a ni," awm ve lo ang hmaka min ngaiin a ti leh a, "Nang te chuan nu leh pa țha tak i nei a, unau pianpui i nei deh duah bawk. I țhiannu erawh fanu mal a nih bâkah, a nu leh pate lah heti mai hi kan ni si a. Lo boral palh ta pawh ni i la tu nge a belh ang, kan boral san hma ngeiin chhûngkaw țha tak te kiangah lawi se la, kan awm loh hunah a baihvai bîk lutuk loh nân," a ti leh duah a.

Hei tak hi alàwm ka hriat thiam theih ngai loh tùr chu, hun hei leh chen min ngaihsak tawh lo va. Tuna taka ka hma ngai ber àwm ang hrima a țawng te hi 'a rilru put hmang dik tak a ni ang em?' tih tal pawh rin dàn ka thiam tawh lo.

"A nih chu,a ni tho mai.....Mahse, Ahriati leh u Mapuia te chu an inhre ngai bawk silo a. Hetia inneih tîr tawp chu i fanu pawh i lainat lo'm ni?" Lucy chuan a ti leh zêl a. Ka zawh ngai lo a, hetiang thil zawh nachâng a hria chu ka lâwm viau bawk.

Ka pa zâwk chuan ngaihsam hmèl tak hian, "Mapuia zâwk khân a hriatna a rei tawh alàwm," a ti êt a. Ka rilru tùr chu min dâwn pui lo ve vai vai khawp mai! Ka pian tirh ata tun hun thleng hian, 'ka fanu hian engtin nge a ngaih ve ang' tihna thinlung a pu chhin ngai lo a, engtikah mah a put pawh ka ring tawh lo.

"Engtin nge u Mapuia chuan a lo hriat daih theih a. Ahriati lahin Nizàn kha a vawi khat hmuhna chiah a nih thu a sawi bawk sia," Lucy-i'n a tih leh chuan, "A sawi lo; mahse, a hriat chian thu a sawi a,a hre chiang ang," a tih lai chuan a fanu ai a, mihrang daih thu sawi apiang a lo lem duak duak chu ka ngei êm avàngin ka tho daih a.

Mi pate ang ni se chuan u Mapuia te lo chêt dàn hi ka rin zâwng an nih loh dànte pawh ka sawi ngam ve tùr a nia; mahse, engtik lai maha ka ngaih dàn leh rilru tùr ngaihtuah chhin ngai hlek lo tu, ka pa ani miau a. Duh dàn leh ngaih dàn nei ve lo tùra an ngaiha an enkawl chhoh ka ni a, duh thlang theiin min ngai chhin ngai lo bawk. Thil thlen dàn hi kan chhûngkaw chunga thleng awm tâwk rêng a nih hi a.

Pindan ah Lucy a lo luh ve lai chuan Tukverh ațang pâwn lam ka lo thlîr veng venga, ka dinhmun chu nausen piang-hlim ang mai hi a niin ka hria. Mahni Inchhûngkhur ngeiah pawh duh ang ang sawi thei lo khawpin ka awm a. Ka pianhlima eng mah sawi thei lo leh mahni duh dàn pawha che sawn thei lo ang mai kha ka ni.

"I ţap em ni?" zawitê a lo tih pahin ka darah a lo vuan a. Lu ka thing nak chu ka kâwngah lo kuahin ka thlìrna lam chu a lo thlîr ve a, "Tikhân i hre thiam tawh em? A fanu rilru tùr aia mihrang daih thil sawi ngai pawimawh zâwk tu a nih kha," kha zet in ka ti sehchilh rap a.

"Tuar hrâm hrâm rawh, i hnial luih chuan a kut i tuar vak emaw te a ni ang a, i hrehawm zual mai mai dâwn. Tihian ngawi hle hle rih la, u Mapuia chu nei la i tuar thei ngang lo a nih chuan rei neih kher pawh a țul nâng, i lo hâw leh ang a, i pa tân sawi buai tùr awm miah lovin, 'aman min țhen alàwm' te pawh i ti thei zâwk ang chu," a ti ve ngial a. Kan inhnemna lah chu a thawven thlâk loh ropui bawk sia.

 

Chawhma lam chu ka inkhâwm ve a, chawhnu lam erawh Lucy te inah kan awm a. Kan in chu chhun lamah phei chuan awmna tlâk a ni lo, khua a lum bawk si, inlêng te meizial khu leh an bengchheng thâwmte nên lu a na bûr thei zêl.

Zàn lamah pawh zànriah ei kham hnu lawkah Lucy te inah ka chho nal nal a. U Mapuia khân an lo lèn tùr thu a sawi si a, lo awm ka tum lo hrim hrim, Lucy pindan ah kan awm dun a, thil dang kan sawi hlei thei thlâwt lo bawk. U Mapuia leh inneih chungchâng ngawt chu kan sawi kan sawi a, awmzia erawh a nei thui lo khawp lehnghâl.

"Awi! An lo lèn tak tak chuan in in khat hunga zu in leh card dêng te bâk an zuk hmu awm dèr silo a," Lucy chuan tiin, a nui zui uarh uarh bawk, "Ka pa bawk in min rawn koh tîr vêl ang tih ka hlau a nia," ka ti hlak hlak chu thâwm ngaichâng ang deuh hian țawng tawh lo tùrin min zap a, "Chu.. U Maliani aw rî ang deuh ka hria. An lo ko tak tak dâwn che a niang," a tih chuan hlauthâwng deuhin a pindan kawngka lam chu ka en dêk dêk a. Lucy lah chuan min lo bawh thut pahin, "Ka tih-der a!" a lo ti a. A nui zui uarh uarh bawk. Mahni lo maha hlauhthàwn hman tawh vei nên, a ti àwm ang lo thei ngawt mai.

"I mak thei ê!" ka ti nang nang chu min nuih nghek a, "i thlaphân hman zia kha," te chu a la ti deuh deuh zui.

Zân dâr 8 rîk hma deuhin khuma a khaikhup zawng a ka Phone dah chu a lo ri ta mai a. Lucy nên chuan kan in melh rang khawp mai, nasa zetin ka thin chu a lo phu rang zui hlawp hlawp a, kan sawi kan sawi vei a, min lo au hâw tak tak dâwn a niang, "Chhâng ta che," Lucy chuan min ti mah se, a mitmeng chu a ngaihngam hmèl bîk chuang loh.

"Ka ning e. Hâw tùrin min ti dâwna ni ngei ngei ang," țap lek leka ti paha Phone ka lak kàn chuan hlauhthàwnna kha thinurna in a rawn thlâk thleng nghâl vek.

Screen ah chuan 'KA PASAL TÙR' tih hi a lo lang kalh a, thinrim lutuk hian "i lo save a ni maw?" ti hlurin Lucy chu ka vîn hrep a. Ani lah chu ka pate call a ni lo tih a hriat tâkah chuan a hmêl a lo pângngai leh vek tawh, "Chhâng vat vat rawh," min lo ti daih lehnghâl. Chuan, he pa pawh hi min lo call ngam hial tawh mai chu a nia. A zak thei lo mang e!

"Eng nge i duh?" ka chhàn rual chuan ka ti vîn hlur a, "I lo biru daih a," hniam chhaka lo ti tu âw rî chu a thûm țha kher mai. Nizàn khân vawi khat mah a țawng ve loh avàngin a âw rî hi ka vawi khat hriatna a ni bawk. A pumrua leh a âw thûm zet chu a inrem vêl vek.

"Ka biru bawk lo e, ka țhiannu te inah ka lêng asin," ngeiawm fahrana ka tih lêt laiin, "I thinrim âw rî pawh a nalh a nih hi," a lo ti thûm leh dût a. Ka hmèl chu inhmu thei lo mah i la, ka hrilhhai lutuk chu ka hawi lawl lawl awm asin.

"I zakthei lo a nih chu a," ka tih chuan a lo nui in ka hria, "Zànin chu ka lo rîm tùr ber i lo lêng daih sia," muang deuh ruihin a lo tih lai chuan, "i va han zakthei lo tak," ka lo ti leh hmanhmawh a. Chu bâk chu amah sawifiahna tùr țawngkam dang ka hre miau bawk si lo, a sawi ang khân Over Plus tih tak tak maite chu ka duh hial tawh.

Ka deu lêtna te chu hre lo ni àwm tak hian, "Naktûk chawhnu dâr 2 ah lo inpeih la, ka lo lam ang che, i nu leh pate bulah ka sawi lâwk vek tawha, kan inah chaw i lo ei dâwna nia," a lo ti leh zet chu ka thinrimna chuan inchung a tâwn pawp zawt maiin ka hria!

"Awi... !! I zak em?!" ka ti tuarh a, Lucy zâwk chuan țawng zawi tùrin min lo khap nghâl zat bawk. A chhan pawh thil thleng mêk hi a nu leh pate bulah kan la sawi ve tlat lo a, a hma aia zawi deuh zâwk chuan, "ka lo ei dawn lo lutuk, i thu thua awm tùr pawh ka ni lo, zak rawh," thinrim eng-phiara ka tih hlawih hlawih lai chuan, "Zak rual ka ni tawh hleinem," a lo ti zawi ruih a. Ka thinrim lutuk sawi ngaihna hre lo chu 'beidawng' tawp khâwk an tih ang hian ka awm ni berin ka hre tawh.

"Zak rual ni tawh lo mah la kei ka zak thung alàwm, thu min pek kual tum rêng rêng suh, i zak thei lo êm mai," tih bawka ka thu sawi ka khàr leh chu keimah tak pawh ka in ngei zozai tawh lutuk. U Mapuia zâwk pawh chu a lo nui huk a. Zakthei lo tih sawina țawngkam dang hi eng nge ni ang le?!

"Ka zakthei lo mawlh mawlh bawk a, Zaktheilo-a nupui tùr i nih si avàngin kan zakthei lo dun dâwn tihna a ni maw?" lo ti duahin a nui zui kur kur a. Bei a dawng tak zet tawh, ka thinrim tehlul nên a thinrim ve duh hauh silo.

Ka tih ngaihna hre lo chuan, "I â tawh a nih kha," ka ti hlak a, thâwk ka la zui halh bawk.

"Ka nupui i nih hma chu ka â tluang zêl dâwna nih hi," a lo ti lêt nghut a, a la thu tak hmêl êm êm zui.

"Ih maw, i thluak kha a buai em ni? I lu kha khawiah emaw i sawh palh em?" ngeiawm deuha ka tih zat zat laiin "Ahriat" a lo ti zawi ruih a, a thin ka ti rim ve ta ah in ngaiin ka nui zui sak bawk, "Sawi ta che," cho âr mai hian ka ti vei âl a. A thâwk la huai huai rî chuan engti kawng emaw tak hian min ti hlim, enkawl ka awlsam loh dàn tùr zia hi hre tlang vek se. Beidawng ngawih ngawih tùrin ka duh miau a.

"Naktûk ah chuan dâr 2 ah lo inpeih la, ka lo lam ang che," a lo ti nghet leh churh a, Phone chu a Off zui daih bawk. Chu Ramhuai pa mai mai chu le!!

Lucy lo nui kar kar lai ka va en chuan Khumah țhu tawh lovin chhuat laiah thinrim zetin ka lo ding reng tawh tih chu ka in hre ve chiah, "He pa hi maw, Lucy a â tak tak a niang!" beidawnna avànga țap lek lek chung hian ka ti țuau a.

"I duh tâwk a i han an khum tak tak mai chu i inhumruh ngat ngat mai alàwm," tiin a lo nui țha ringawt. Phone chu Khum chungah theh thlain kei pawh ka bawk zui hnawk bawk, "Ka chau vek," ka ti chuai raih chu ka mawngah a lo bêng thlawp a.

"Hetiang tak hian i thinchhiat ka hre ngai silo a, i lo thinchhe tan tan reuh e," a ti bai bai reng chu melh rânin ka ngawi hle hle a. Kei pawh hian hetiang êm êm hian thin tertek ka nei tih ka inhre bîk miah lo, ani khân a rawn chawk tho chiang țhìn êm mai pawh a.

"A beidawng dâwnin ka hre lo"

"Beidawng mai mai dâwn lo e, in Inchhûnga a en dàn che ka hmuh khân maw 'tumruhna' ka hmu tel alàwm. Kha tak khân ka ngaiha ti țha lo rêng a, Car man to hmêl deuh te kha an ta a lo ni leh zêl bawk sia. I pa in an pawisa a bat sak ang a, rulhna tùra neih dâwn loh chuan nangmah kha lâk mai pawi tih lohna a hmêlah khân ka hmuh chian êm vàngin alàwm ka ngaih a țhat loh êm êm," a ti vei duah a. Tûn țum ka buaina tawha a thil sawi te rêng rêng hian min hnem lo thei asin aw.

"I thil sawi vêl dàn hi ka duh miah lo, ka lam țang nge i nih ani lam țang kha?" ka ti a, dar lo sàn zauh pahin, "tui lâi rap in ka awm mêk," a lo ti chiah chu țhu chhuak hluai in ka melh nghâl ran a. Amah vêk chuan, "Awi, i meng rum thiam vêl e," nuih har har pahin a ti a, "Ka țhiannu i ni a, i duh thlanna ni miah lova pasal i neiha țûl hi ka lungawiloh pui che; mahse, ngaihtuah chian chuan pasal atân u Mapuia ai a țha hi an awm leh dâwn chuang em ni?" A tih chuan, "Ka lam i țang lo tawp a nih chu, ka hâw dâwn," ka ti hmak a.

Khum bula Chappal ka inthawlh sawt sawt chu ka bân bulah min lo kuah pahin, "i thinrim lo tiraw? Enteh, Mipa țha leh pasal tlâk tùr an vàn tawh êm avàngin hmeichhe tam tak te hi chuan kan duhthusàm ve te pawha standart kan hnukhniam tial tial a. Tu mahin pasal tùr atân BDO ang te phei chu kan suangtuah ngam tawh hleinem," a ti mial mial a. Thil hi a sawi a sawi ve tawh chuan àwm ang deuh hian a chhuah ziah mai lehnghâl.

Ka hâw a Inchhûng ka luh rualin u Maliani chuan, "Mapuia te an lo lêng a," a lo ti nghâl var a, ka pa chuan Card a lo dêng leh tawha, min ngaihsak lo hlauh chu a làwmawm.

Chhâng lêt lo a ka thaw hliai chu, " 'ka be mai ang' kha a ti a, a lo bia che em?" min ti leh a. "Aw" tih chauhin ka chhâng a. Pindan ah ka lût tlang nghâl daih bawk.

U Maliani bawk chuan min lo zui lût ve a, rilru buai deuhin Khum tlângah ka țhu hnawk a, "Enteh, naktûk ah an inah chaw ei tùr angin min sawi em?" ka ti a. Mãwl biak tawp hi duh lo țhìn viau mah ila 'nu Malian' tih tur êm chuan kan kum a inthlau silo, mahni nuhrawn te 'U Malian' tih ngawt lah a dik dèr silo, ka lai laklawh kual vêl vek.

"Sawi e, I pa bulah a dîl hmasa thlap a nih kha" a ti a, beidawng zetin bân ka vai chiam ringawt. Ka pa bulah a sawi tawh a nih chuan ani saw chuan, ka duh thlanna a ngai pawimawh leh dâwn miah lo.

"Ka ning e... ih maw, amah kha thinrima ka àn khum hrep paw'n a thinrim ve duh bawk si lo a," ka ti leh mial mial a. Min thinrim khum ve se, in hnial buai hrep i la, inneihna tùr hi thleng lo se ka duh a, amah lah chuan țha deuhin min lo dawngsawng zêl bawk si, chêt lâk dàn tùr ka ván viau tawh.

"Nichin a min lo call paw'n ka lo hau hrep a, a thinrim duh lo rêng rêng," ka ti leh niah niah a, u Maliani meuh ka sawipui ta mai chu ka tih dàn ngai loh tâwp a ni; mahse, ka ipik in ka rilru a buai êm êm si a. Ka rilru a lo lang hmasa apiang hi sawipui ka neih nghâl zêl loh chuan ka thâwk te hial a chham mai dâwnin ka hria.

Nui pahin u Maliani paw'n, " 'Mi zaidam thlah' ti hial a an sawi țhìn kha an ni ve alawm. An chhûngkua hi an zavai maiin an dam thlup vek mai a, Mapuia erawh a zia a dang deuh ka tih tawh kha, râwlthar sualte kha a nei ve tum hrang a. Mipa zaidampui ni mah se, a thin-thawk chu a tawrhhlehawm khawp ang," a ti a. Min hrilh nge min sawi țhaih zâwk pawh ka hre thiam bîk lo.

"Engati nge hmeichhe tam tak zîngah kei kher hi min thlan le? Ngaihzâwng a nei ngai lo em ni? Keimah ni lo a nupui nih châk tak tak an tam dâwn vei nên aw," ka ti vang vang a, "Chûng hmeichhe tam tak zîngah chuan nangmah a thlang miau che sia," a ti a. Beidawng deuha ka en chuan min lo nuih var var a, ring zeta au nghek a leh kual tawp tawp mai te chu ka châk ut ut.

A tûk khua a lo vâr a, nì lo chhuakte chu anchhia lawh mai ka châk dâwn dâwn a. Chawhnu dâr 1 a rîk meuh chuan Lucy zâwk a phisek tawh. Kawr hâk tùr min thlan chhuah sak thul.

Kei chuan nasat hmèl deuha inchei a, a chhûngte mit ti kham zâwnga awm ka duh a. Amah thung chuan zahawm taka inchei tùrin min duh a, kan inhnial dun hlak hlak reng a. A tâwpah chuan kawrfual hring dal raih ah chuan kan inlungrual thei ta a. A bân bùl a nih avàngin Cardigan pan hâk tel tùr kan thlang chhuak tel bawk.

"A lo lam tùr che a bulah a sawi lawk vek tawh sia, i pa hi chu a ti mak thei e, Card dêngin mi a la hui khawm dur dur tho a," Lucy chuan a ti a. Kawt a Car lo ding thâwm ah chuan kan inen dun nghâl a. Ka huphurh êm êm laiin ani erawh a phûr hmêl hrep zui!

Ka rilru kil khat chuan u Mapuia chu Inchhûnga lo lût lo tùrin a duh a. Kil lehlam erawh chuan, 'heti hian kan chhûngkaw nunphung dik tak chu lo hmu fai kelh se la, an chhûngkaw mil pui kan nilo tih hmu thiamin a beidawng ve mai ang' a lo ti ve bawk a.

Inchhûngah chuan a lo lût ngei tih hriat deuhin thâwm a awm zui nghâl a. Ka pa chuan, "E, Mapui i lo thleng thei maw?" a ti hlut a. A card dêng chu a zahpui hmêl loh khawp lehnghâl.

U Mapuia pawh chuan, "In va țhahnem ve" a ti dût a. Nizàn hmasa bâk kha ka hmu leh tawh silo a. A zamawm ve duh khawp mai.

"Keini chu kan heti zo tawh a, min hre thiam a niang chu, kan țhian kawm thiam dàn a ni tawh si a," ka pa in a ti lêt luam a, ka lo ner sak mai.

Pindan ațang kan țhian dun chuan kan inzui chhuak a. U Mapuia chu a lo țhu ve ang chu tih nâklaiin Card dêng te țhutna hnung lamah chuan a lo ding a, Țhutthlèng nghenchhan nam paha ding kùn deuh chung hian ka kal chhuak lai chu min lo en run bawk. Kan inhmuh hmasak ber țum ang chiahin a mitmeng dum fiah zet chuan min lo melh chiang leh hlè tawh.

"I hman tawh maw?" zawi sup a tiin a ding mar nghâl a, officer a nihna chu a lan dàn ațang ngawt paw'n a hai theih loh ni ber hian ka hria. Tshirt vâr țha sersawr tak leh Jeans kekawr a inbel ngawt chung paw'n a lan dàn chu 'a sar vuah' tho.

"Kal nghâl mai in tum em ni? Thingpui te in ve phawt la," Lucy zâwk chuan a lo ti ve ngial a. U Mapuia chuan nui suk in a bâna Sana chu a bih thuak a, a lo hawi chhuak leh chuan Lucy zâwk chu en in, "i fel hle mai; mahse, khiti lamah min nghâk mêk sia. Kan kal nghâl mai ang," a ti a. Kan Inchhûngah chuan ro a rawn rèl nghâl a ni ringawt.

Ka țhiannu kianga ka lo ding ngawi reng chu thle deuh paha mit ti zîm sun chungin min lo en leh a, ka lo melh rum lutuk chu a hre thiam nghâl ngê ni, a nui leh ruh ruh bawk, "I hman chuan kal nghâl mai ila," dam thlupa a lo tih chuan men kual ralh pahin thâwk ka la hak a.

Lucy zâwkin ka pa card dêng lai chu "Pa Fal, hei Ahriati te an kal dâwn hi," tiin a zuk au làng láng a. Ka pa lah chuan a Card den lai țhulh chuang miah lo hian, "ummm, kal rawh u," a rawn ti puat a, ka ngei tak tak a sin aw. Kan chhûngkaw khawsak phung nên a inthlau lutuk te hnena lawi lût tùrin min beisei a, chu ngawt pawh ka tân a nawm loh tawh sa tehlul nên; ka rem tihna tel lovin a ina lêng turin 'âw' a lo pawh ngawt bawk a. 'Ka tân an chhûngkua hmachhawn chu a harsa ang em' tih lam rêng a dâwn thleng leh tawh bawk si lo.

"Ka pu kan kal ang e, tlai lamah keimah bawkin ka rawn thlah leh dâwn a nia," u Mapuia chuan a ti a. Ka pa lo chhàn lêtna pawh chu ngaithla zo duh lovin Kawngkapui chu ka pan zui daih, Lucy paw'n min lo ûm chhuak ve nghâl a.

Nizàn hmasa a Car bawk kha kan kawt ah chuan a lo ding a, "zam miah suh aw.. u Mapuia mizia en hian a chhûngte pawh an sual lo ang, i zam lutuk chuan i chechhe vak mai dâwn a nia," a ti sar sar a. Chutiang te chu Ka pa min hrilh tùr ni àwm zâwk tak a ni.

"Ka han sapatal chiam ang, an Inchhûng anga lawi lût tlâk ka ni lo tih an hriat thiam ngei ngei nân ka han khawsa ang e," inkuangkuah tau sawk sawk paha ka tih chuan, "Awi, nang chu bei i ti dawng e, chutiangte chuan i han awm tak tak ang e," rilru hah hmêl deuh hian a ti hliai a. Kawngkapui a u Mapuia lo chhuak mêk chu va en pahin, "Fel deuh khân awm ringawt mai rawh, a nu leh pate pawh zah deuhin bia la, chaltlai deuh a i han awm tak tak chuan ka ngei ngawt ang che," a ti sar sar a. U Mapuia'n kan bul a lo thlen rual chuan ding mar in a lo nuih zui var var bawk.

"I țhiannu chu lo zui ve mai ta che," nèlawm takin u Mapuia lah chuan a lo ti thûm dût a. Lucy chuan lu a thing nar nar a, "Aih, tûn țum chu ka zui rih lo ang che u; mahse, nakin zêlah erawh ka tel ve char char tawh ang. Zawh tùr che pawh ka nei țeuh," a ti sawk sawk a. A biak vêl dàn chu a mi nèl deuh bia te pawh a ang zâwk alàwm.

"Lucy tiraw?" ti sup paha Lucy zâwk a en chhuk rùn chuan Lucy paw'n, "Aw Lucy" ti pahin kut a lêk chhuak a, u Mapuia paw'n nuih suk suk chungin a lo chibai nghâl a.

"Nang hi i fel dâwn riau," a tih lai te chuan Lucy nuam ti chu a keh hui reng mai.

"Kan kal dâwn chuan kal vat teh ang," vîn deuh hlek hian ka ti hlar a. Hetia kan awm reng chuan ka țhiannu hi a lamțang ah a siam tak ngial dâwn tlat.

U Mapuia pawh chuan a Car lamah bân a lek chhuak vut a, inkuangkuah at a ka kal nghâl tur chu Lucy-i'n min rawn pawt ding deuh nawk a, a ngaihna hrelo deuha ka en lai chuan ka țhutna lam hawng tùr a, u Mapuia kal vut chu a va melh ralh a, "Gentleman dik tak chuan a hmeichhe tân kawngka a hawn sak țhìn a, Chair a pawh chhuah sak bawk țhìn. Royalwoman paw'n chutiang tih nachâng hre lo mipa chu a chhuah pui tùr a ni lo," ka beng bulah a lo ti sar sar a, chutiang dànte chu a lo awm ngai a ni maw?!

Ka țhutna lam tùr pawt hawng paha Mapuia'n min lo en leh lai chuan, "U Mapui Ahriati hi a la naupangchhia ve sia ngaihven viau ang che, i chhûngte nên rei deuh i awm fàl tîr chuan thil nilo lote a sawi ang a, in phek buai chiam phah mai ang," a ti zat zat a, ka darah lo kuah paha Car lamah min kal phei pui lai chuan rum deuh hian ka melh vak a.

U Mapuia lah chuan Lucy thil sawi chu a lo lawm phian ni tùr a ni, a ri meuhin a lo nui hawk hawk mai! "Ka ngaihven țha ngawt ang," a ti nghet churh a. Nui hmèl la pu tho mah se a mitmeng erawh a thu tak viau lawi.

Kan tlãn chhuak tùr te chu Lucy chuan kut min vai nasa mai, kan tlãn chhuak fel chiah erawh Motor chhûng boruak chu a țang zui ut a. Mahni inkhawngaihna leh thinrimna te chuan min tuam hlup hlup a ni ber. 

Nizàn hmasa lawkah ani hi ka pasal tùr a nih thu ka hria a, tûnah a chhûngte hmu tùrin an In lam panin kan kal leh mêk bawk. Thil thleng mêk ah hian ka duh thlanna pakhat mah a tel ve lo a. Chuti chung chuan keimah chuaha paltlang tùrin ka pa in min inthiarfihlim san leh daih bawk, nausen pianghlim dinhmun ah bawk ka ding nawn fo dâwn a nih hi.

Thawhțan nî chawhnu lam a la ni bawk a, motor pawha lo thâwl ang reng viau. An in lam ni ngei tùr kawngah chuan a tlãn mawp mawp a. An veng tak ngial pawh ka la hre lo tih chu hre chhuakin rilru chavai zet hian kan țhen sak bawk.

U Mapuia chuan min lo melh thuak a, "i țha em?" zawi sup a a lo tih chuan rum deuhin ka melh nghâl ram ram a, "Ka țha in i hria em ni?" ka ti zui hlak bawk. Hetiang hian ka kawlhsen lui tlat dâwn tih chu lo ring lawk ni àwm takin a vei nuih suk a.

"I hmêl chu a țhat ngaiin a țha reng a..." a ti fân ruih a, a nui zui ruh ruh chu, "min hre chiang ang te khân Ka pa bulah i lo insawi thla ngawt a, min hre chiang em ni? Engtik laiin nge min lo hriat chian hman a?" ka tih khum kha kha a, min lo en leh thuak pahin, "ka hre chiang che alàwm," a lo ti ve sup bawk.

"Engtik lai khân nge min lo hriat chian hman ka tia làwm?" a hma aia vîn mahin ka ti leh nghek a, u Mapuia paw'n, "Ngaihtuah chiang la chuan nang paw'n min la hria ang maw le.." a lo ti hniam ruih a. Side glass ațang chuan kan hnunga motor lo tlàn ve te chu a bih pah zauh bawk, țawngkam vîn a hmang ve duh bawk si lo. Ka ngei a nia.

"Ka hre ngai lo che,engati nge min neih hi i lo duh thut a, kan innei tê tê ang a vaiho bulah min hralh daih theih i inring zawk em ni?" thinrim leh rilru ipik fahran a ka zawh lai chuan a lo nui huk a. Min lo thlek leh a, ka hmêl thu tak lutuk a lo hmuh leh lek phei chuan a nuih a za zual tulh tulh ni berin a lang.

"Nui ringawt suh, min neih i duh chhan hi tlang takin min hrilh rawh, a chhan chu eng vàng pawh lo ni se hre ve tùrin ka châk tâwk a, hriat ve ka phû bawk," ka ti leh hmawk hmawk a, ka insawi thinrim thar leh a ni ber mai, ka thâwk a rangin ka thâ te pawh a za leh vek tawh. Insehruh țeuha ka en lai chuan a lo nui tawh bîk lo va, min en na mitmeng pawh a dam zual sauh bawk.

"Ka nupui ni tùrin ka duh che, chu lo chhan dang a awm lo," ka hlauhthàwn rûkna chu hre thiam ni àwm takin a âw pawh a dam thlup a, ka ring thei chuang miah lo thung!

"Chu thil chu ka rîn tâwp i beisei em lo'ng chu maw? Dâwt min hrilh miah suh, kan chhûngkaw dinhmun chu i lo hmu vek tawh a, i hre chiang tawh bawk. Ka chhûngah eng thil pawh ti la, chhan tu tùr ka nei dâwn lo tih i hriat chian vàng chauhvin min neih i duh. Chhan ka ngaihna chhan tùr chu ka la hre thei lo mai pawha ka la zawng chhuak vek ang," tia ka sawi lai te chuan ka khùr titih tawh. Dik taka sawi chuan eng mah ti thei lo leh duh thlang thei lo tùrin ka nu leh pate'n min siam tawh a, ani hian ka nu leh pate ang chiah a min invaivung khum ka hlauh luatah, a thunun theih ka ni lo tih lantîr nân ka thiam ang angin țan ka khawh a ni ber zâwk.

"I rilru a lo buai hlè a ni maw, ngaihtuahna reng i pu mak sak mai," chîk taka min en chungin a lo ti khauh.

"Buai rêng e, ka hriat ngai miah lohin ka chhûngte bulah min neih duh thu a lo sawi ve ringawt a. Rilru inkhâp buai hlek lova ka lo pawm ngawt i beisei em ni?" hau titih pahhian ka ti ve zêl a, "Ngaihtuahna maksak pui puite kha intihbuai tîr lovin min ring tawp rawh," nghet charha a lo ti lêt chu, beidawng lutuk hian ka melh ngawt ngawt a, sawi leh chuan tùr pawh ka hre tawh lo.

Hma lam en run mah se thinrim lutuk a ka melhna chu hre thei ni àwm tak hian, "I thinrim mitmeng pawh kha a nalh viau tho a nia," a lo ti hluk, min en leh tawh chuang miah lo!

"Țha deuhin min neih duh chhan chu min hrilh ve mai la," vîn deuh hian ka ti chhuak thut a, thâwk la hluai chunga min lo en laite chuan insualpui mai inpeih at in ka awm tawh.

"Ka nupui ni a ka hlawhtlinna te min chenpui tùrin ka duh che," nghet zet hian a lo ti ta churh, ngeiawm fahranin ka lo nui hak thung, "i hlawhtlinna tehhrep chu eng atân mah ka ti nek lo ve," ka ti hlar a, beidawng zetin ka țhut dàn ka siam țha a. Min be leh pawh ni se ka chhâng tawh miah lovang.

"Min zawh tùr i la neih chuan thil dang pawh min zâwt zêl rawh," a ti leh duah a. Ngawi ngalin hma lam ka melh lui tlat a, Kawng pengah a tlãn luh hma chuan min lo en in a kiai suk tih pawh ka mit sîr chuan ka hmu reng; mahse, silent treatment ka pe dâwn a ni tawp mai.

"Ka nu leh pate bâkah kan tê ber Meme-i te an lo awm dâwn a, an khirh hran lo va zam lutuk duh suh," a ti thûm bul bul a. Ngaithla ang pawhin ka awm duh lo.

In lian pui kawmchhak ah chuan Car chu a ti ding ta a, a kekawr ipte zen nghâl ruk ruk pahin Phone a phawrh chhuak a, 'tu tak be dâwn ni maw' ka lo tih rilrûk rauh rauh lai chuan ka mal-chunga ka Phone hum lai chu a rawn rì ve chiah. Ani pui roh lah chuan screen ka en hman hmâ hauhin ka bân rêkah a rawn hmer chut a, ka phone screen chu a lo bih a, min lo melh run paha a kiai tak suk ah chuan thil hriat chhuah ka nei nghâl zâwk.

Ka Phone screen ah chuan 'Ka pasal tùr' tih bawk kha a lo lang leh kulh a, nui ruh ruh paha u Mapuia'n a phone a hmeh tâwp rual chuan, "Ka save a ni miah lo a nia," ka ti ve vat a. Ka thil sawi chu hre lo ni àwm tak hian muangchângin Gate-ah chuan a tlãn lût a.

"Ka save a ni lo ka tih tawh chu, Lucy lo save vek a nih hi," ka tih leh ngial paw'n a nui suk suk duh lek tawh mai si. Keiman ka duh thu a ka save angah a ngai ang tih mawlh chu ka hlau tak zet.

"Enteh, ka save a ni lo ka tih kha aw," ka tih leh chuan, "I save a ni lo," a lo ti ve dût a. A la nui cheu lehnghâl.

A bulah chuan insawifiah pawh ka tum buai peih tawh lo. 'Lucy vàng vek' ti a phun hlak hlak pahin a number chu save țhat ka tum a; mahse, ka bânrêkah bawk a lo man leh chawt tawh.

"Save țha duh suh," hniam ruiha a lo tih chuan vîn leh nghek inpeih at hian ka en nghâl a, "kei paw'n khatiang tho khân ka save che alàwm," țha tê tê hian a lo ti leh a, a phone screen chu min lo hmuh pahin min siai zauh a. Screen ah chuan, 'Ka nupui tùr' tih a lo inziak tak tak.

Eng mah ka sawi leh hma chuan, "kan thleng ta e," a ti leh hluai a. Ka bânrêka man na chu thlahin ka darah a lo tuai thuak bawk. Car chhûng ațanga a chhuak vut chu chechâng lawk lovin ka en zui reng a, ka țhutna lam min hawn sak tùrin Car chu a lo kal hual a.

In kawtzawl zau nuam deuhah kan lo awm reng tawh, in bul hnaiah chuan Pangpâr chi hrang hrang hi an lo khawi vul chèk chûk a, in hma lam chu an Pangpâr khawi chuan a hliah bo titih bawk. Ka țhutna lam kawngkhàr lo pawh hawn pahin, "Ui pahnih ngawt kan nei a, Ui i hlau em?" a ti a. Ngunthlûk fê hian min en vung vung bawk.

"Thlen vek tawh hnua hlauh leh hlauh loh han inzawh chiah mai chu," tih-el deuhin ka ti nghat a. Car ațanga ka chhuah ve paw'n a lo tawlh sawn duh miah lo a, kan indinchilh chiang khawp mai.

"I hlau em sawi țha la," thu tak deuh hian a ti leh sup a. 'Hlau' pawh lo ti ta i la an Ui chu engtia han tih vak nge a tum le? "Husky an nia, an lian ang reng a," min ngaihtuah hmêl deuh hian a ti leh a. Ka hlauh chu a hlau deuh tak tak niin a lang.

"Hlau lo, Ui hlau rual pawh ka ni tawh lo," ka tih tâkah chuan a lo nui suk a, a tawlh sawn ta hrut bawk. Amah chu kal hlat san deuhin an in chu ka thlîr vang vang a. Veranda zau țha tâkah chuan țhutthlèngsei leh dawhkàn tê a lo awm bawk a, an in chu a ropui tih chiam tùr ni silo hian in tih a hriat bîk ngawih ngawih.

An Garage-ah pawh Car pakhat leh Scooty pakhat zawng a lo inhûng a. U Mapuia lo khalh hi chu a mimal ta bîk a nih ka ring.

In lam pana kan kal dâwn chuan a kutphah hlai țha zet chuan ka hnungah a lo chùl thuak a, "mihrang an awm lo ka tih tawh kha," a ti a, a kut pawh a la sawn leh nghâl mai bawk.

"engati nge i chhûngte hmu tùr a min hruai ngawt a,"

"An mo tùr chu an hmuh ve bawk lovin" a ti a, rum deuh a ka han melh chhoh chuan nui hmèl pu si lovin a hmêl chu a lo lang dam viau lawi.

"Ka hriatpuina tel lovin ka chhûngte bulah inneih chungchâng i sawi ringawt tihte an hre ve em?" ka ti leh ngat a, ding meuh a min chhuk en rùn tâkah chuan ngeiawm fê in ka nuih lêt a. A chhûngte paw'n innei thut tùr kan ni tih chu, an hre miah lo tih hre thiam in ka huaisar thar ta sauh bawk.

Sawi tùr tam tak nei hmêl pu chunga min en ngur lai chuan, "Mapui" lo titu an lo awm a. Kawngkapui ah chuan a nu ni ngei tùr chu a lo chhuak mêk bawk.

"Aw.. in lo thlen tawh te chuan lo lût vat ta che u," nèlawm deuh hian a lo ti nghâl bawrh bawrh a. A upa ve tawh chuan ka ring; mahse, nu in enkawl uluk tak chu a ni ngei ang.

"Nu, i hmuh châk êm êm Ahriati chu a nih hi," ka darah lo kuah pahin u Mapuia chuan a ti zãng vûk a. Mak ti lutuk a ka en chho nghâl háw chu dam dap hian min lo en lêt ve a. A nu hian ka chanchin hre nual tawh angin a țawng miau a, ka tân chuan mak tih lohna chi pawh a ni lo.

"Ahriat.. Ka nu hi chibai la," a ti zui sup a. A mitmeng dam thlup phêna warning na lo lang chhuak chu ka hmu thiamin ka hria.

A nu zâwk chuan kut a lo phar chhuak hmasa a, kan inchibai lai te chuan lungawi hmèl taka nui chungin a fapa nên chuan min melh dun a, "Lo lût rawh u, Ahriat, i chhâwl a hàl em?" Inchhûng lam pan pahin a ti zui a.

"Aih" ka ti ringawt, u Mapuia paw'n ka dar a kuahna kha a la thla tawh a. An Inchhûnga kan pên lût chiah chu a lo dai raih a, a fel faiin 'In' nih chu a inrem bîk tak zet. Inchhûnga luh chiah hian țhut-khâwmna a lo awm nghâl a, bangah chuan TV hlaipui a lo awm bawk. Chumi thlang lamah chuan indaidanna êm êm awm lovin țhutkhâwmna dang bawk a lo awm leh nghâl a. TV ni lovin The Last Supper lemziak lianpui bangah chuan a lo intar ve tawh thung a. Chu țhutkhâwmna ah chuan Tukverh sang leh lianpui mai a awm a, Bathlàr zau țha hek hawk tak chu a lang chiang viau bawk. 

Kawngkapui ațanga ding lamah chuan inchung panna kailawn a awm chho a, kailawn hnuai lam chu mut pindan ah an hmang bawka nih hmel. Vei lamah chuan Choka leh dinning area a awm bawk a, Mutna pindan ni tho tùr kawngkhàr pahnih a awm tel bawk.

Țhutkhâwmna chhûngril zâwkah chuan pa ber ni ngei tùr chu Bible chhiarin a lo țhu a. Keini pathum inzui lût min lo hmuh rualin Bible chu dawhkànah a dah a, a lo ding ve nghâl bawk.

Nu ber chuan, "Hei, i mo tùr chu a lo hruai ve ta alàwm," a ti zui bawrh bawrh a, a pa pawh chuan hlim hmêl tak hian min lo chibai a. Choka lam ațanga hmeichhe âw hian, "Û, tuisik ka lo keng dâwn em?" a rawn ti lang lang a. An tê ber Meme-i chu a nih ka lo ring ve ringawt bawk.

"Țhu la," min ti sup in a pa lo țhutna bul Sofa-ah chuan min țhuttîr a, chumi hnu chuan lo au tu chu chhâng lêtin, "tui vâwt kha lo keng rawh, kawchhûng a sahâl pha tlat," a ti a. Rei lo tê hnuah kei aia û deuh tùr hmeichhe pakhat hi tray-a Glass no pahnih chawi chungin a lo lang ve nghâl zat bawk.

Thil thleng mêk chu mumang a ang ka ti, an chhûngkua chuan min ngaihsak in min be lumlam reng a. Ka insiam laia ka tum rilrûk ang kha chuan khawsak khum chi pawh an ni lo, an țhain an zahawm lutuk a, a zahawmna chuan min inkiltawih tîr miah chuang silo.

Kan tuisik inna no ruak Meme-i'n a seng fel leh laiin, a nu chuan, "Zirlai a la ni sia, a exam zawh hunah law law ka lo hruai ang a ti țung roh a. Hei, a pa nên phei chuan 'lo hruai hâw tùr a nei tak tak lo a niang,' tiin kan lo ringlel rum rum tawh mai asin," a ti a. A nuih zui kar kar laiin zawhna ngah deuhin u Mapuia zâwk chu ka en a. A chhûngte bulah hian kan pahnih inkârah awm a awm angin dâwt a lo sawi țhìn tihna em ni?

"Ahriat, pasal neih chu i chhûngte'n an rem ti ang maw?" A nu in a lo tih leh tâkah chuan amah chu ka en leh thuai a, " 'A in exam zawh hunah ka lo hruai ang a, palai pawh a tirh zui theih ang' a ti mai si a, keini lam chu palai tirh tùr buaipui in kan lo phîlî viau tawh a nia," chîk deuh a min en chungin a ti leh zêl a. Chhàn ngaihna ka hre lo lutuk chu, thil nih dàn engkim hrilh vek mai ka duh hial zâwk!

Mahse, ka rilru chu lo hre tlang vek ni mai àwm hian u Mapuia chu a lo inrawlh zat a, " Nû" a lo ti deuh hluk a. A ding chhuak zui hluai bawk, "Ei rawng bâwl tak tak hmain ka room lamah ka han chhoh pui ang e, a hmu ve châk a," a ti duah a, ka en chho chu amah zui tùrin min mit mei zui zat bawk.

Kan kal hran dâwn lai chuan, "Nakin ah duh tâwkin i la titi pui dâwn a nia," a ti a, a nu chu hmangaih hmèl deuh hian a nuih bawk.

Kailawna kan inzui chhoh lai chuan hauh dàn tùr ka ngaihtuah khawl char char a, an inchung lam pawh chu a lo phuisui leh viau tho. A pindan kawngkhàr ni ngei tùr chu nam hawn pahin lût tùra min hrilh nân a thle bak a.

Ka pên lût chiah chu ama rim a lo nam nghâl chèk chèk mai, lo lût ve paha Pindan kawngka a nam phui chiah chu, "I chhûngte bulah pawh dâwt tho i sawi a ni maw?" ka tih khum nghâl zat.

"Engtin nge Kohhran upa meuh pawh i bum ngam zâwk a?" ka tih leh chiam lai chuan a lo nui a, "ka pa a nia lawm," a lo ti mai lehnghâl!

"I pa pawh ni mah se engati nge dâwt i hrilh kher a, kan inngaizâwng ţhìn angin i hrilh a ni tiraw?" rilru ipik deuh hian ka ti a. Thâwk ka la zui nghek bawk, inngaihzàwn lawkna kan nei lo tihte hre ta se, kei hi eng angin nge min ngaih ang? An fapa in inneih a duh thu a sawi rual rual a, lo 'âw' mai thei hmeichhia ang leka min ngai tùr chu ka duh bîk dèr bawk silo.

"I chhûngte duh loh zawng deuh ngaihzâwng i nei em ni?" ka vei rûk reng ka zawh lai chuan âtthlâk tih hmèl zet hian a lo nui hawk a, "Khati'n min ngaipawimawh lo ang maiin nui ringawt zêl suh. I chhûngte duh loh zâwng tak ngaihzâwng i neih avàngin, in inkâr thup nân chuan min hman in tum niin ka hria. A dik em?" pawisak neih loh hmêl deuhin ka ti zêl a.

Inhmatawnin kan ding a, zu zuar fanu mai ni mah ila an scapegoat atân kei kher min thlang chu ka duh lo, "I ti mak êm mai, i lo hmuh ang bâk kha kan ni miah lo nâin, hetia inthup nân a inhman mai mai tùr chu ka ni lo asin," thinrim zeta ka tih lai chuan ka mittui a lo tla pap a.

Ka hruk hul tâwk laiin, "ţap suh," a lo ti ve dût bawk, "Ka ţap bawk lo," en chho vah paha ka tih laite chuan ka mittui chu a lo tla zêl tho bawk sia, hriat thiam loh hmêl deuh a min en in ka mittui chu lo tuai hul mai a lo tum ve a, "min khawih suh, ka țap emaw i lo ti ang e, ka thinrim lutuk avàng leh ka huat êm vàng zâwk che a nih hi," ka ti ram hmak a.

A kut chu la lêt in awm dàn tùr hriat loh hmêl deuhin a tukkhum a tuai puat a, "A va buaithlâk awm ve aw, thinrim apiang a țah mai chu.." a ti bul bul a, ngei zet a ka melh lai a " Psychiatrist i pan duh em?" a lo ti zet chu ka alh pup maiin ka hria.

"Mi â ka ni lo," ka tih khum tuarh a, ka âu ring bawk si nên pindan kawngkhàr lam chu a va melh a. Chutah, ka darah lo vawn pahin min nawr hnung dat dat a, Chair tawlhsawn thei ang ah khân min nam țhu a, ka tho lehnghâl at tùr chu min nam țhu leh hnawkin Chair chawp chuan a Khum zau zet lamah min hnûk phei a.

Thinrimna avànga ka thâwk a ran vek laiin ani erawh a chêt phung a buai chhin lo va, Khum tlângah chuan a țhu a, a lamah min hnuk hnai salh bawk, "Mi â i nih loh avàng tak chuan alàwm psychiatrist kan pan ang, mi â tân te chuan pan buai an ngai hleinem," a ti dam thlup a. A laka ka thinrimna chu a hre thiam lo ngê, a hre thiam lo der zâwk pawh ka hre thiam tawh lo.

Beidawng deuh hian, "I â tawh a nih hi!" ka ti hlak a.

"Kan â ve ve sia, kan pahnih in psychiatrist chu pan ang aw," a lo ti leh zet chu ka inthunun thei tawh thlâwt lo, a chhîp sam buk laiah chuan ka kêk nghek a, chumi rual chiah chuan pindan kawngkhàr chu lo in kik riin a lo inhawng zui nghâl a, "û, u Allan-a te pawh an lo thleng tawh," ti chunga Meme-i lo lût in keini pahnih min rawn hmu thut chu a meng zau nghâl kâwk a.

U Mapuia ka kehna chu ka thlah rang khawp mai. Meme-i lah chuan hlauhthàwn hmêl deuh hian, "engati nge a?" a ti zui ruai a. Ka hawi lêt ngam tawh lo hrim hrim.

Nui suk pahin u Mapuia chuan, "Memte, lo lût tùr a ka hrilh hma che in i lo lût ringawt a, kan chance neih chhun i rawn ti buai vek alàwm," a ti a. A nui zui leh hawk chu dâwt a sawi tih rêng tu mahin an hre hauh lo ang.

Meme-i pawh chuan," Awi, in insual ta mai emaw ka ti hman alàwm," a ti a, "lo chhuk thla vat r'u" ti a nui pahin a chhuak lehnghâl a. Kawngka a inkhàr rîk khap rualin ka kê a intlawh khalhin tawlh hnun ka tum ve nghâl a.

Mahse, u Mapuia chuan Chair bân tawn tawnah rawn vuanin a lamah min hnuk lêt thut a, ka lo inring bawk si lo nên Chair kê in khum a sut dawt rualin, Chair ațang chuan ka dawk chhuak thut a, amah chu ka va bawh rawk rawk a. Nghet deuh hian min lo kuah bet nghâl a, "Got you," a lo ti fiam zui zat bawk.

"Min thlah rawh," ti paha inlahrang tùr a ka țang nghâl at chu min lo kuah nghet zual sauh a, ka mawng chu Chair hmawr tâwkah la awm tho mah se a darah min kuah bet hlu hlu a. Ka tal aih aih nâin ka tibuai pha lo lutuk ni tùra ni, a kutphah hlaipui chuan ka hnungah a lo bêng thak thaka, "Hahdam phawt la ka thlah ang che," a ti thûm dût bawk.

"Khawi teh!" tal paha ka tih pawh chuan, "Min kêk leh palh ang" uang zet hian a lo ti zuk a, a nui che dawt bawk.

Ka tal chhuak thei bawk si lo chu ngawi rengin ka thaw ta hle hle a, naupang kan awih mut dâwna a hnunga kan ben sak thek thek ang chiahin min sawngbawl a, "I ziaawm deuh tawh em?" tih paha ka hnunga ben thek thek lai chuan, a mi khawihna chu ka hriat tawh hnu niin ka hre ta tlat a; mahse, ka ngaihtuah lêt ngial pâwn ka hre chhuak zo bawk si lo.

A darah khabe nghat paha, "Tu nge i nih?" ka tih sep chuan a chawl a. Ka bân bul ve ve ah lo manin min nawr hla hlek bawk, chiang taka a mitah en chungin, "Tu nge i nih," tih bawk chu ka zâwt leh a.

"I pasal tùr Vanlalramdinthara," a ti nghet churh a, ka mitah chiang taka min en ve chungin a vei nuih suk bawk.